April 4, 2024; Mamit Thalai Pawl hruaitute leh Hachhek bial Kuhva chingtu pawl hruaitute chuan Dapchhuah leh Zamuang check post te rintlak leh changtlung zawka thuam turin sawrkar an phut.

Pawl pahnih hruaitute chuan nimin chhun khan Kawrthah North Branch YMA Run-ah Joint meeting an nei a, Mizoram sawrkarin foreign kuhva dan lova Mizoram chhunga lakluhte a do chu tha an tih thu sawiin Dapchhuah leh Zamuang check post te rintlak leh changtlung zawka thuam tha turin Mizoram sawrkar an ngen tih an sawi a.

Kuhva tharchhuahte hralhchhuah kawngah Mizoram sawrkarin Farmer te kuta dah mai lovin an mawhah ngaia, market tha zawk an nei theih nana hma lak sak a, minimum support price pawh siamsak tur leh Mizoram kuhvate state danga a hnawng mai loh nana hma laksak turin an ngen a, remchang hmasaah Mizoram chief minister Lalduhoma hmuh nise an ti bawk.