Jimmy Laltlanmawia

Khawvela pheikhawk siamtu Company hlun leh lian tak mai, “NIKE” te sumdawn auhla, ‘Just do it’, tih hi hre lo kan awm lo mai awm mange aw a tih theih awm e. T-Shirt-ah te, pheikhawk leh lukhum leh bag-ah te ‘Nike – Just Do it’ tih chu an print a, a lar em em mai a nih hi.

Kum 1977 January 17 khan kum 36 mi, Gary Gilmore-a chu petrol pump-a thawk mi pakhat leh Motel Manager a thah avanga thiam loh chantir a ni a, hemi hun hma lam thangkhat lian zet chhung chu Utah state-ah hian thi turin mi sual tumah thuneituten hrem an nei tawh lo a; mahse, chutiang a nih hnuah, a hmasa leh ber atan America ram Utah state-a Firing Squad-ten Gary Gilmore an kahhlum dawna thu hnuhnung a nei em tih an zawh tum a, eng dang sawi khawtlai lo leh zam miah loa a chhanna, “Lets Do it,” tia a thu hnuhnung chu, Advertising Company Wieden+Kenedy agency te chuan kaihlekin, Nike company sumdawn auhla, ‘Just Do It’ tiin, Nike company chuan a lo lar phah ta em em mai a nih hi.

He sumdawn auhla hi a lo chhuahna ber chu tualthattu ka atangin ni mah se, mi tam tak, a bikin sports mante tan chona hmachhawn tura tiphurtu leh tihuaisentu a ni ta zel a, chutiang chiah chuan tunlai khawvel sumdawnna khawvelah pawh hian he Nike company-te sumdawn auhla hi mite fuih phurtu leh tihuaisentu a ni reng a ni.

Hripui avangin mi tam takin an hna an chân a, mahni in lamah ram dang atangin an haw sung sung a, ram danga thawkchhuak ve lem lote pawhin kan hna kan chhunzawm mumal thei chuang bik lo a; nimahse, heti reng hi a ni dawn lo a ni tih erawh chu kan hriat a pawimawh. Engtik niah emaw chuan hripui hi a kiang a nih loh vek pawhin, loh theih lohin he hripui hi tlang hri leng dangte ang bawka chenpui dan kan zawn a, hma lam pan tura kan ke pen kan chheh rem a ngaih hun chu a thleng dawn tho tho a ni.

Tin, he hripui hi lo leng lo ta pawh ni sela, tunlai khawvel intlansiakna hautak zet karah hian, a hnam ang pawha kan dinchhuahna tur chuan, mahni kea ding thei tura kan san mara kan thawh harh a ngai tak zet mai. Chuvang chuan eng thil pawh hmachhawn dawn ila, kan hma zawna tih tur awmte chu huaisen taka kan bawh a, Nike company-te sumdanna auhlaa mi ang hian inngaihtuah lungpuam buai hmasa loa hlawhtling ngei ngei tur a kan chet chhuaha ‘Just do it’ kan tih a ngai a ni.

Mizroamah hian eng party pawhin sorkarna siam se, engtik khawtikah mah sorkar hna hian min daih dawn lo tih hi kan hriat tlan vek a ni a, chuvang chuan, a bik takin thalaite hian ngaihtuahna pa hrek hrawk kan neih a hun tak zet tawh a ni. Khawvel ram changkang kan tihte kan thlir chuan an sorkar hnathawkte aiin an entrepreneur-te thawh rah avanga an dinchhuah nasatzia kan hmu thiamin a rinawm a. Khawvel kal dan her danglam vektu pawh sumdawnna khawvel hi a ni tih kan hrethiamin a rinawm. Dik tak chuan khawvel ram ropui pahnih, USA leh China te inngur chhan ber pawh South China Sea-a zalen taka sumdawn veivahnaah thuneitu leh chungnung zawk nih an duh vang a ni ber a, chutiang tak chuan sumdawnna hian khawvel hi a hawi lam tur a hawitir a ni ber a ni.

Kan ram zim tê-ah hian hma kan sawnpui theihna tur leh tih tak taka kan beiha kar loa kan economic dinhmun chawikang dawrh thei tur khawp recourse hi a tam khawp mai a; nimahse, tun thlengin chu kan theihna tam zawk chu haichhuah loh leh hman tangkai loh a awmin kan sum leh pai tam zawkte chu state dangah a luang ral hiau hiau reng mai a nih hi.

Vairengte khuaa kan kal chuan phai lam atanga truck lian pui pui lo chho zut zut reng maite kan hmu ang a, kan state mamawh tam zawkte chu minute tin mai hian an rawn phur lut zung zung reng mai a, Aizawl hmun hrang hranga godown-ah chuan state dang atanga an thil lak luh an rem tiang er ur mai a; mahse, rei an kawl hman meuh lo, ni tinin a zo duak duak zel a, Vairengte lamah lah chuan vai turck lian pui puite chu, kal lam aia haw lam hlawkna ropui tak chu chang ta lo chuan, kal lama an phurh rih em avanga an kal pur pur laiin, an haw lam chu engmah phurh nei loin a limin an lim haw leh a, phurh hawtir tur engtham mah kan lo nei bawk si lo a. An phurh haw tam berte lah chu thirchhia leh Burma ram atanga kan economy thlawh khuma an lak luh kuhvate an la ni zui a.

Lock down dawn avangin vai mistiri leh helper an khaw lamah an tlanchhe haw ve bawk a; tichuan, tlemin lockdown a’n ziaawm a, construction work tam tak, cement hmanga in sak te, steel fabrication etc te chu, an vai mistirite awm loh avangin an hna an chawl thuap mai a nih kha. Chu mai a ni lo, Aizawla vai dawr a inhawn dek dek chuan an slu bag leh dailuah bag te, buhfai bag te chu, a buk a tling em, a thar tha em tih lam ngaihtuah hman lo lekin kan inchuh zo nghal duak duak mai a nih kha. Kan thingtlang lo neitute taimakna zar zo tur awm lo phei sela chuan thla khat kan han inkhung khan Aizawl khawpui phei chu kan tam chhe hman thawthang mai a nih kha.

A bikin Mizo thalaite hian sumdawnna lam kan luhchilh a pawimawh hle mai, thil siam chhuah lamahte tan kan lak a ngai. Sorkar hna ringawt kan um chuan kan khawtlai ngei ngei dawn a, sorkar hnain min daih vek dawn si lo a, a tawpah chuan retheihna khurah kan tlu lut mai ang tih a hlauhawm tak zet a ni.

Thil pawi deuh mai chu loan laka rulh that leh loh hi a ni. Bank loan tel loin sumdawnna lian a kalpui theih tak tak loh; mahse, kan bank tam zawkte lah chu mi fimkhur lo leh dawngdah thenkhatte avangin an fimkhurin loan pek an harsat em em tawh mai bawk si a. Bank-te hi kan chhawr tangkai thiam a hun hle mai. Graduate ve lai si, bank account pawh la nei mumal lote hi kan lo la tam em em mai a. Nupui fanau neih hnu pawha bank account mumal la nei lote hi la zuk han awm a mawle.

Sorkar chet hun nghak loa sorkar chu che lo thei loa kan siam zawkte pawh hi a ngai niin a lang. Mi tam tak chuan, a engamah hmain sorkar tanpuina kan han beisei nghal ringawt mai a, tanpuina dawngtlak kan ni em tih pawh keimahni ngeiin kan inchian hma hauhin subsidy kan awn nghal tui mai a, chutiang subsidy dawnte chu lawmawmin tangkai viau mah sela, dawng lo pawh ni ila, ka va han ding chhuak dawn chiang tak, tia kan insehruh a hun tak zet.

Mi huaisen chu, hlauh nei lo satliah ngawt hi an ni lo a; mi huaisen dik tak chuan a hmaa tih tur awm leh mawhphurhna chu hlen chhuak turin a bei fat fat thin. Mizo thalaite pawh hian chutiang huaisenna chu kan hneh a ngai a ni. Kan dream tihhlawhtlinna turin thilmak a lo thleng dawn lo a, Pathian malsawmnate hi Van atangin a rawn tla dawn reng reng lo, Nike-ho sumdawn au hla ang hian kan dream tipuitling theitu chu keimahni vek hi kan ni, “Just Do it” kan tih a ngai. Kan ngaihtuahnain a ngaihtuah thleng phak a nih chuan a tak ramah pawh kan chantir thei ang. Bultan hun tha ber chu tun hun hi a ni tawp mai, hun tha kan beisei hi engtikah mah a lo thleng ngai lo ang; chuvangin, danglamna kan ram leh hnam tana thlen tur chuan, “Just Do it” kan tih a ngai a, thalaite hian kan ram zim tê hi reilo teah kan sawi her danglam vek thei a ni. Just do it, lets make a difference!

Lalpan Mizoram Malsawm rawh se.