Danish Siddiqui

Admin - Jul 18, 2021

Journalist huaisen thihna leh a chanchin thenkhat

Taliban Thuchhuah chu

Taliban te chuan Danish Siddiqui an thah chungchangah hian thuchhuah an siam a, "Inkahna thlengah khan journalist kahhlum a nih thu kan hre lo a, engtia thi nge kan hre lo a ni," tiin an thu puangtu Zabiullah Mujahid chuan a sawi. 

Zabiullah Mujahid chuan sawi zawmin, "Indona hmunah journalist an awm a nih chuan min hrilh hre tur a ni a, an lakah zahngaihna kan lantir tur a ni. Hriattirna pek kan nih loh avanga Indian journalist Danish Siddiqui chunga thil thleng hi pawi kan ti tak zet a ni," tiin, indona hmunah journalist an awm ve tih an hriat loh  vanga vanduaina thleng a nih thu a sawi. 

--------------

Pulitzer Prize

Danish Siddiqui hi khawvel huapa chawimawina ngaihhlut tak Pulitzer Prize dawngtu zingah a lo tel tawh a, photojournalist tan chuan hei tluka chawimawina ropui hi a awm chuang lo. 

-----------

Reuters team hian kum 2018 khan Rohingya refugee te dinhmun khawvel mit hmuha pho chhuah kawngah hna an thawh that avangin Pulitzer Prize for Feature Photography an dawng a, chawimawina ropui an dawn theih nana thawh hlawk tak chu India tlangval Danish Siddiqui hi a ni. 

Danish Siddiqui kut chhuak zingah hian September, 2017-a Bangladesh-Myanmar border-a raltlan naupang dinhmun tha lo tak leh beidawng hmel taka a awm lai a lak chu khawvel dengchhuak khawpa lar a ni. 

Indian photographer lar leh huaisen Pulitzer prize hial pawh lo dawng tawh Danish Siddiqui chu Afghanistan-ah July 16, Zirtawpni khan kahhlum a ni. 
Afghan Special Forces te chuan tun hnai khan Kandahar province-ah Taliban hel dapchhuah beihpui an thlak a, Zirtawpni khan nasa taka inkapin Danish Siddiqui hi helte hian an kaphlum a ni. Kum 41 mi Danish Siddiqui hian Pakistan ramri hrula Afghan security forces leh Taliban te inkap hi a cover a, vanduaina a tawk ta a ni. 

Pasaltha a fam ta!
India chhul chhuak zingah photojournalist tha berte zinga mi Danish Siddiqui hi Reuters tana thawk mek a ni a, kum 2010 khan khawvela news agency lian ber zinga mi Reuters hi a zawm a ni. London khawpuia hmunpui nei Reuters hian journalist 2500 vel leh photojournalist 600 vel an nei a, khawvel hmun hrang hrangah an inzar pharh a ni. 
Danish Siddiqui hian Afghanistan leh Iraq tualchhung buaina hmunah a hna tha takin a lo hlen chhuak tawh a, a hna thawh hi mi huaisen bik tan lo chuan thawh chi a ni lo. Rohingya refugee te dinhmun zirchianga chenchilhtu zingah a tel a, heta a kutchhuak thlalak tha tak takte hi khawvelin a ngaihlu tak zet a ni. A kut chhuak hi khawvela media firm liante pawhin an an rin ber pakhat a ni a, award pawh a dawn phah nual a ni. 
Danish Siddiqui hian Hong Kong-a mipui lungawi lo ten kawngzawh an huaihawt tum te leh Nepal-a lirnghing nasat tak avanga chhiatna rapthlak tak thlengahte khan a hming a lo chher tawh viau bawk. 

Khawnge a ruang a awm?
Taliban te chuan Danish Siddiqui an kaphlum palh chu pawi an tih thu an sawi a, ngaihdam dilna an tarlang. A ruang hi Taliban te hian Red Cross kutah an hlan niin India sawrkar chuan a puang a, a ruang hi India-ah lak a ni ang. 

Afghanistan President Ashraf Ghani chuan Indian photojournalist Danish Siddiqui kahhlum a ni chu pawi a tih thu leh a chhungte a tuarpui tak zet thu a sawi a, an ram chu journalist te zalenna leh himna hmun ni zel tura an beih tur thu a tarlang. 
India rama Afghan embassy pawhin an ram president thusawi hi an tarlang bawk a ni. 

Share now