Zaimite leh mipuiin an hlut em em Darbu Music App hi artist thenkhat chuan an hlawkpui chho der tawh a, App kaltlang hian hlawh mumal tak an nei chho tan mek. Darbu App kaltlang hian tunlaia ‘kartawp hla’ lar em em 'SDO Dance' hmangin K. Hminga chuan thlakhat chhungin Rs. 1,00,000/- chuang a lalut tawh niin Darbu App neitute chuan an tarlang.

Darbu-ah hian hla chhuak thar ber ber ngaihthlak tur a awm a, hla hlui tha tak tak dahluh mek zel a ni bawk. Kimkima feat G’nie hla thar 'Ka Ngai Che' tih chu nizani khan Darbu Exclusive-ah lei theiha chhawpchhuah a ni a, a hit viau mai thei. Kimkima hi kum khat dawn zirna avangin a reh vang vang a, hla thar nen a lo kir leh ta e. 

Tun hnaiah hmundanga la awm lo Mizo rohlu tak tak ni si, Mizo Male Voice Hmasa Ber – Thuchah Kengtute, Mizo Female Voice lar thin – The Friends album te, C Vansanga Album kimchangte leh Mizo Choir album kimchangte Darbu Library-ah hian dah belh a ni. Mizo hla thar pawh kim taka dah zel an tum bawk.