ZALEN June 4, 2025: Dawrpui Vengthar tlangval Jehu Anderson chuan a club khelhna Wellingborough Cricket Club tan nimin khan century a siam.

Season liamtaa Mizoram cricket league sangber MCL-a Chhinga Veng Cricket Club tana khel Jehu Anderson hian English county cricket club an lut thlain Wellingborough Cricket Club a zawm a, he club hi India cricketer ropui Yuvraj Singh-a lo khelh tawhna a ni.

League kallai mekah nimin khan a club khelhna hian Loddington & Mawsley Cricket Club an hmachhawn a, he match ah hian century siamin runs 116 a vawchhuak a ni.

League kallai mekah Jehu-a hi ala che tha hle a, match 5 khel tawhin runs 344 a siam tawh a, average runs 86 a nei mek a ni.

Jehu Anderson hi Nov. 12. 1999 a piang niin a naupanlai atangin Bangalore-ah an khawsa a, school team-ahte tel chhovin Mizorama cricket khel turin a rawn chuang chhuak a. 

Jehu Anderson-a nu Hrangthanchhungi hi Mizo zaipawl lar hmasa ZEF Zaipawl member thin a ni. Hrangthanchhugi hi Mizo hmeichhe zinga theologian kan neih tlemte zing ami niin Serampore College-a BD a zawh hnuah UTC, Bangalore-ah MTh a zo leh a, doctorate degree nei zuiin tunah hian Bible Society of India-ah Asst. Director (Church Relation) nilai mek a ni.

Northants Cricket League (NCL) hi tunhma khan Hevey Building Supplies Northamptonshire Cricket League tia sawi thin a ni a, Northamptonshire biala crocket inelna changtlung ber a ni a, English Cricket Board-in Premier League a neih zinga pakhat a ni. 

Northamptonshire county pual league a ngaih a ni nachungin a chhehvel county - Bedfordshire, Buckinghamshire, Cambridgeshire leh Leicestershire te pawh an tel thin a, league lian thawkhat tak a ni.