Kumtina sem thin Daytime Emmy Award chu June 25, 2021 (Zirtawpni) khan sem a ni a, Kelly Clarkson chuan award pahnih lain mimala langsar ber a ni. 

Daytime Emmy Award vawi 48-na hi National Academy of Television Arts and Sciences ten an buatsaih niin,  video-conferencing hmanga sem a ni a, CBS chuan live-in an pechhuak a ni. 

American Idol hmasa ber Kelly Clarkson hian 'The Kelly Clarkson Show' hmangin award pahnih - Outstanding Entertainment Talk Show leh Outstanding Entertainment Talk Show Host te a dawng a, nikum lam khan chawimawina a lo dawng tawh bawk. 
'Because of You' singer hian The Kelly Clarkson Show hi kum 2019 atang khan a kalpui tan chauh a, a hlawhtlinpui hle. Award dawng tur hian tawn hriat ngah tak leh Daytime Emmy Award pawh vawi riat lai lo dawng tawh 'The Ellen DeGeneres Show' chu a khum a ni. 

Tun tumah hian Outstanding Game Show chu Jeopardy! ten an la a, Outstanding Morning Show chu CBS Sunday Morning, CBS kutah hlan ani thung. Outstanding Informative Talk Show atan Red Table Talk thlan niin, Outstanding Entertainment News Program award chu Entertainment Tonight ten an la bawk. 

Daytime Emmy Award hi National Academy of Television Arts and Sciences ten an sem chhuah niin, US-a television programmee hrang hrangte hnenah hlan thin a ni. Kum 1974 khan a vawi khat nan sem chhuah niin, kumin hi a vawi 48-na a ni a, Sheryl Underwood chuan award ceremony hi a host a ni.