Aizawl: Zirtawpni kal-ta (Feb.7,2014) khan 60 mega watt pechhuak thei tur Tuirial Hydro Electric Project (HEP) hnathawh kal mek chu Aizawl chan-chinbumi thenkhat ten Chief Media Officer, NIB, David L Thangliana hovin an tlawh a. Project thawktu NEEPCO Engineer te chuan December, 2015 ah hnathawk theia siam hman ngei an tum tih an sawi. Tuirial HEP thawktu North Eastern Power Corporation Ltd. (NEEPCO) Engineer te chuan project hi February 2015 ah zo tura tih ni mahse huntiam chhunga an zawh hman dawnloh vang in December 2015 thleng hun an dilbelh tih an sawi a, har-satna dangin a tlakbuak loh chuan hun tiam chhunga zawh hman ngei an beisei tih an sawi bawk. NEEPCO thawktute chuan an hnathawh-na kawng hrang hrang ah buaina leh harsatna liantham an neilo tih an sawi bawk a, helho hnen atangin vauna engmah an dawng lo tih an sawi. Tuna an harsatna ber chu kawng a ni tih sawiin Assam ram chhung Bhaga-Natacherra-Saipum kawng chu a chhiat em avangin bungraw phur motor te tan chetvel a harsa a, hmanraw engkim phai atanga lak vek anih bawk si avangin hei hian harsatna min siam deuh a ni an ti. Saipum khaw bul ami Tuirial HEP khuah nan hian Cabinet Committee on Economic Affairs (CCEA) chuan July 16,1998 khan vai-belchhe 368.72 chu a remti a, hemi sum hmang hian hna-thawh tan a ni a. Compensation chung-changa harsatna avangin June 9,2004 ah hnathawh kal mek chu tihtawp a ni a. January 14,2011 ah bultan thatleh a niin, CCEA chuan he project pumpui hna-thawhna atan hian vaibelchhe 913.63 a remti a ni. Tuikhuah hna (dam construction) chu a chanve vel zawh a ni tawh bawk a, tui luanchhuahna tur (spillway) pawh siam zawh tep a ni a, kawlphetha siam chhuahna tur (power house) chu siam tan mek a ni bawk. Tuirial HEP hi NEEPCO ta a ni a, clearance ngai tur chu neih fel vek a ni tawh. 60 mega watt pechhuak thei tur Tuirial HEP ah hian Mizoram chuan 12% (7.5 mg.wt) chu a thlawnin a chang dawn a, a bak zawng hi NEEPCO hnen atangin a lei ang. Mizoram hian a mamawh vanglai (peak hour) ah mg.wt. 70-80 vel a mamawh a, Tuirial HEP hi zawh anih hun chuan power a harsatna zualpui chu a ziaawm beisei a ni.