Delhi-a pisaa hman in chhawng lia sang chu Zirtawpni tlai khan nasa takin a kang a, mi 27 vel thiin mi 12 velin hliam an tuar bawk niin emergency services chuan an sawi.

Kangmei a chhuah lai hian a chhungah mi 70 vel an awm nia hriat a ni a, police-in a tukverh tichhiain hruiin thenkhat chu an khai chhuak hman.

Mundka metro station bul lawka kangmei chhuak thelh nan hian kangthelhna khawl 20 vel hman a ni a. Electric current kal sual avanga kang nia ngaih a ni.

India-a chanchinbute chuan chhiatna thleng kaihhnawihah mi pahnih man an ni tih an tar lang hlawm.

Prime Minister Narendra Modi chuan chhiatna thleng pawi a tih thu leh nunna chânte chu Rs. 2,00,000 theuhva ral an nih tur thu a sawi.

Kangmei hi thelh mih fel a nih hnuah chhanchhuah hna thawh zui a ni a. “Chhiatna thleng kimchang hre tur chuan hun a la ngai deuh vang,” tiin Deputy Chief Fire Officer Sunil Choudhary chuan a sawi niin Times of India chanchinbu chuan a tar lang.

Thite ruang tam zawk hi chhawng hnihna hmuh an ni hlawm nia tar lan a ni bawk.

Tual chhung thuneitu pakhat, Jogi Ram Jain chuan tuna an hriat mai theih chinah chuan electric kal sual vanga kangmei hi chhuak ta nia an ngaih thu a sawi a. In hian kangmei lakah a him tawk tia pawmna (fire safety certification) a nei lo niin a sawi bawk.
    “Ngun takin kan chhui ang a, municipal thuneitute zingah dan bawhchhia an lo awm a nih pawhin, tu lakah pawh na takin action lak a ni ang,” a ti niin the Hindustan Times chuan a tar lang.