Aizawl May 17, 2023 : Vawiin khan Aizawl District Police te chuan thuchhuah siamin April 28, 2023-a Bankhansi Mandir kawt, Chandni Chowk Delhi Police Booth bula thi-a chhar, a finger print atanga Vanlalruata s/o Rualkhuma, Govt. Complex, Lungmual nia hriat chu hriat chhuah a nih theih nan mipui puihna an ngen. Govt. Complex/Ainawn Veng lam chuan hetiang mi hi an Veng-ah an awm ngai an hriat loh thu ZALEN an hrilh.

Ainawn Veng YMA hruaitute hnen atanga thu dawn danin ruang hi Delhi lama Mizo Welfare hruaitu te chu Delhi Deputy Resident Commissioner Alexander V. Chawngthu ho pawhin an zuk finfiah tawh niin ZALEN an hrilh a, a hmel enin Mizo ni lovin hnamdang ni ngeiin an hre zawk a, finger print hi an tihsual a nih an rinthu te pawh an hrilh niin an sawi. Thlalak an thawn pawh hnamdang thlalak nia an hriat thu an sawi bawk. Ainawn Veng YMA hruaitute chuan an veng chhungah hetiang mi hi an dap ngial pawhin an veng mi ni theia an hriat loh thu an sawi bawk a ni.

Ni 5 May, 2023 a Deputy Commissioner of Police, North District, Delhi hnen atangin Aizawl District Police te chuan information an dawng a, April 28, 2023 khan Bankhandi Mandir kawt, Chandni Chowk Delhi Police Booth bulah mi tu tih hriat loh mipa, kum 40 leh kum 45 inkar vela upa, Feet 5 leh Inches 4 a sang ruang chhar a nih thu an hrilh.

Delhi Police lam chuan Ruang chhar hi Fingerprint record atanga a lan danin Vanlalruata S/o Rual Khuma of Govt. Complex, Luangmual, Aizawl, Mizoram ni a hriat a ni a. Amah hriat theih nan hian Police ten hma lak mek a ni a, tun thleng in a chhungte emaw ama nihna diktak hriat theih a la ni lo. Chuvangin amah emaw, a chhungte hria emaw, a hriat theihna kawnga Police te pui thei an awm chuan phone No. 8794747295/ 8794747293/ 8794747292 ah te hian hrilh turin an ngen a ni.