March 4, 2024; March ni 1, 2024 (Zirtawpni) zan a Delhli khawpui a veng pakhat Hauz Khas Village a silai nen a mi rikraptu chu Mizo nula PC. Vanlalruati chuan pawm chilhin, huaisen takin a silai a chhuh sak. He a thil tih huaisen thlak tak hian Delhi tlangah lawm a hlawh a, chhuangtu a ngah hle. 

Hauz Khas Village-ah March ni 1, 2024 zan khan mi pathum an intibuai a, an zing pakhat chuan pistol lekin mipui a rikrap zui a, hei hi a hriat veleh PC. Vanlalruati hian panin, a va pawm chilh a, a pistol a laksak hnu-ah mipui pungkhawm ten silai nen a mi rikraptu hi kut an thlak zui a ni. Mipui lak atanga a chhanchhuah leh hnu-ah police station lamah hruai a ni. 

Silai nen a mipui pungkhawm rikraptu in a ken pistol ah hian a mu pathum a lo awm a, mu hnih chu a magazine ah a awm a, mu khat chu a chamber ah load sa in a lo awm.

Huaisen tak a a chetna avang hian Delhi police hotu lam te pawh an lawm hle a, an chhuan thu pawh PC Vanlalruati hian a dawng hnem hle.

He a thil tih chungchangah hian ZALEN zawhna chhangin PC. Vanlalruati chuan thil dik a nih chuan huaisen tak a tih tlang thin mai chu a duh dan a ni tih a sawi. "Mi buaina tawh ah kan pui thei a nih chuan keimahni pawh kan hlim thin a, kan puih te pawh an hlim mai bakah an him thin," a ti bawk.

Nula huaisen PC. Vanlalruati hian kum 2016 khan Delhi police a zawm a, tunah hian Delhi ah in luah in a khawsa mek a ni. Safdarjung police station chu a postna ni mekin, buaina thlenna hmun Hauz Khas Village hi a thawhna police station huam chhung a ni.