India chuan coronavirus hri leng thawh hnihna a paltlang vel mek laiin, a thenawm ram, Asia khawmualpui ram hrang hrangah erawh inkai an pung chak thar mek.

Asia khawmualpui ram tam takah hian ram tlema zawng tih lohvah chuan invenna pek an la tlem hle a, hetih mek lai hian Delta variant a darh chak hle.

World Health Organization (WHO) chuan India rama hmuh hmasak ber, Delta variant hi Covid hri chi zinga inkai awlsam ber niin a sawi.

India thenawm hnai zual thenkhat - Nepal, Pakistan leh Sri Lanka-ah chuan May-ah khan a vanglai an tawng hlawm a, tunah hian kai hmuh chhuah hi an tlahniam leh tan.

Nepal hian an tuar na hle a, an damdawi in pawh an indaih lo va, mangang takin an awm hman.

Afghanistan-ah pawh June thla khan hri kai an tam em em a, Health Minister Wajid Majrooh chuan hri kai zinga 60% chu an khawpui, Kabul-a mite niin Delta variant vang a nih thu a sawi.

WHO chuan tun hnaiah Bangladesh, Indonesia, Thailand leh Mongolia-ah hri kai an pung thar hle bawk niin a sawi.

Delta variant hi Covid-19 chi thar, a pangngai atanga insiam danglam kha a ni a. India-a hmuh hmasak ber a nih avangin Indian variant tih thin kha a ni a. WHO-in Delta variant a tih hnuah tunah hian hemi atanga damlam leh, Delta plus a awm leh tawh.

Bangladesh

India nena ramri thut tak intawm ramah hian May thla laihawl atang khan hri kai an pung chak hle.

Sorkar chuan May 25 leh June 7 inkara hri kai 68% chu an khawpui, Dhaka-a mite an nih thu leh Delta variant kai an nih hlawm thu a sawi.

He hri hian a tihbuai nasat em avangin tun hnaiah ram pum inkharkhip an puang a, an kalpui mek.

Inkharkhip an puan hma lawk atangin Dhaka-a hnathawka awm tam takin an khua an pan a, hei hian ram pumah hri a tidarh nasa hle.

Bangladesh-ah hian invenna damdawi pek tan hma hle mah se a muang hle thung a, April thla atang phei kha chuan an pe tawh lo va. Damdawi hi India atangin AstraZeneca dose maktaduai 1.6 an dawng a, India hian April atang khan invenna thawn chhuah a titawp.

June 22 atang khan invenna pek hi an kalpui leh tan a, hei hi China-in a siam, Sinopharm vaccines a ni ve thung a, hei hi a thlawna dawn a ni a, a tam tawk chuang lo.

 June 30 thleng khan an ram mipui 3% pawhin invenna hi a bikimin an la dawng phak lo.

Indonesia
July 20 atang khan inkharkhip an kalpui tan mek. June thla tir atang khan hri kai leh thihpui an pung chak leh tan a, sorkar chuan Delta variant niin a sawi.

Health ministry chuan chawlhkar thum liam ta chhunga an endik zinga hri kai 60% dawn chu Delta variant kai niin a sawi.

Invenna damdawi an pek pawh an kalpui chak thar a, heti chung hian mi cheng zinga 5% pawh an la pe thei chuang lo.

President Joko Widodo chuan ni khata dose maktaduai khat pek tumin tan a la a, August atang phei chuan hemi let pek hi an tum.

International Federation of Red Cross & Red Crescent chuan tun hnai khan damdawi in khum leh oxygen indaih lohna thleng tanin buai an hmabak niin a sawi.

Thailand
Tun hnaia hri lai leh thi reng reng chu Delta variant kaihhnawih an nih thu an ram medical sciences department chuan a sawi.

Kar liam ta tir lam khan department chuan hri kai zinga 26% chu an khawpui, Bangkok-a mi an nih thu leh a kar hmasa khan Delta variant kai pawh an hmuh chhuah thu an sawi.

Delta kai hi an thliarkar, Phuket-ah pawh hmuh an ni a, he thliarkar hi an tourism industry dinhmun tihthat leh nan khualzinte tan an hawng leh tawh.

Thailand-ah hian June thla tawp thleng khan mi cheng 4% emaw vel chauh invenna hi an la pe kim thei a. Prime Minister Prayuth Chan-ocha chuan an dinhmun chu a khirh a; mahse, Thai mite chuan an dam khawchhuak thei tih an inring tawk niin a sawi.

Mongolia
An ram mipui zahve aia tam hnenah invenna a bikimin an pe tawh a, an damdawi hman ber hi Chinese siam, Sinopharm vaccine a ni.

Invenna damdawi pek chak taka kalpui hi sorkarin ‘nipuiah chuan Covid tel lovin’ tih thupui neia a kalpui a ni.

Heti chung hian tun hnaiah Asia khawmualpuia mihring cheng zat azira hri kai pun chakna ber pakhat a ni ve mek.

Sawi dan thenkhatah chuan Chinese vaccine an hman chuan hna a thawk tha tawk lo a ni ang tih a awm mek bawk.

Hetih lai hian June thla khan thuneitute chuan inkharkhip an hawn tak avang a nih zawk thu leh Chinese vaccine-ten hna a thawh loh vang a nih loh thu an sawi.

Indonesia-ah pawh vaccine hi Chinese siam an hmang a, an pek zinga 85% chu a ni hial a; mahse, damdawi ina thawk mi eng emaw zat chu Sinovac vaccine bikim an lak hnuah an thi nia sawi a ni.

Epidemiologist-te chuan he vaccine hian Delta variant hi a ngam em tih an chhui mek.

Indonesia-ah hian vawi thum lak a ngai dawn em ni tih zawhna a tam phah hle a, WHO erawh chuan tul a ti lo.

Sinovac (leh Sinopharm) hi WHO-in hman atana a pawm ve ve an ni.