ZALEN, Nov. 24, 2024: Mizo bân elh chak, Asia champion lai, Denic Lalruattluanga chu Inrinni zana 33rd Lelte Award 2024 semah Young Achiever Award hlan a ni.

Kum 26 mi, Denic-a hian October 19-26, 2024 chhunga Mumbai, Maharashtra-a Asia ram 15 atanga bân elh chak 800 chuang bakah Indian arm-wrestler 350 chuang fuankhawmna, 8th Asia Arm Wrestling Cup & 7th Asia Para Arm Wrestling Cup-ah khan 80kg senior huangah gold medal lain Asia khawmualpuia roreltu a ni.

Asia champion a nih hma pawh hian ITI Veng, Aizawl tlangval, Denic-a hi India junior huangah Mizo zinga Champion Of Champions hmasa ber dawttu lo ni tawhin hialin ram pum huapa senior huangah pawh Champion of Champions a lo ni tawh bawk.

Kum 13 a nih atanga bân elh chak nih tuma bei tan, Denic-a hiMizoram arm wrestler zingah chuan ram pum huap inelnaa medal la tam ber a ni mek tawh a. Mizoram Arm Wrestling Championship hrang hrangah pawh vawi 14 ngawt Champion of Champions ni thei a ni. 

Tun dinhmunah hian Mizoram chhung bakah India hmarchhak leh India ram pum puiah ani aia chak zawn rei thei an awm lo vang tih ngam a ni mek bawk. 

Inrinni zana Dawrpui Multipurpose Hall, Aizawla 33rd Lelte Award (Lengzem) semnaah hian United Sports Association of Mizoram (USAM) President VL Sawma'n chawimawina hi a hlan a ni.