Aizawl; Inthlan dawna campaign nan mimal/vantlang in/hmun hman dan chungchangah candidate leh political party ten fimkhur taka kal tur leh, Mizoram-a Dan hman mek 'The Mizoram Prevention of Defacement of Property Act, 1995' hnuaia ziah angte tha taka zawm turin Aizawl District Election Officer chuan nimin khan ngenna/hriattirna thuchhuah a siam. DEO chuan 'The Mizoram Prevention of Defacement of Property Act, 1995' tlangpui tarlangin, a neitu hming tarlanna ni lova, mimal leh vantlang in / bang / kawngpui etc. tibal leh tichhe zawnga thiltih reng reng - chil chhak khum, zun khum, lehkha / poster tar emaw ziah rante chu pawi-sa chawia tantir theih a nih thu te, mimal emaw pawl emaw hlawkna/hamthatna tura hetianga thiltih a awm chuan, chu mimal emaw pawl hotu emaw chu, a hriatpuina leh remtihna lova thiltih a ni tih a finfiah theih loh a nih chuan, Dan bawhchhetu-a ngaih an nih thu leh, he Dan bawhchhe zawnga hma latu leh chet tum apiang te chu bawhchhetu hremna pek theih an nih thu te a tar lang a. He Dan bawhchhe zawnga inhnamhnawih apiang - sum/hmun/hmanrua/tanpuina lo petute chu hrem theih an nih thu te leh chutianga ziah ran/tih balh etc. te chu DC-in tul leh tha a tih angin a tirehin a senghawi thei tih tarlan a ni bawk. -------