Aizawl; Lok Ayukta chuan kum 2013-18 chhunga sawrkar sum dik lo taka hmanga puh Kolasib DIET Principal hlui C.Vanlalmawia chhuichiang turin Anti Corruption Bureau a hriattir a, an thil chhui hna hi thla 6 chhunga zo fel turin a hriattir bawk.

Kolasib MZP Hqrs president hlui Zosangliana Rokhum chuan RTI hmanga zawhna a siam, Kolasib DIET-in an chhanna ah thil dik lo a awm nia hria in Lok Ayukta-ah complaint a thehlut a. RTI hmanga an zawhna ah Kolasib DIET in training an buatsaihah mitthi tawh te, pension tawh te leh training-a kal lo hrim hrim te pawh kal anga tarlan a ni a, heng mite hminga pawisa (fund) pek chhuah hi tam tham tak a nih thu a sawi a ni.

ACB te pawhin preliminary enquiry hi an nei zo tawh a, mi 257 te chu thu zawt fiahin Kolasib DIET Principal hlui hian CSS sum leh state matching share sum Rs. 164 lakh a hmanna te chu a dik tawk lo niin a tarlang. Training-a mitthi tawh te ko anga tarlan chu pha in C.Vanlalmawia chuan SDEO leh SSA office lamin training tura hming an submit te an nih thu a sawi a, a chhuitu officer chuan heng sum te hi training naa tel te hminga lakchhuah a nih loh thu leh sum khawih chetna atan dan kalhin a mimal account a hmang niin a sawi a. An chhuichhuahna ah Rs. 42 lakhs chu 'extra voucher' a awm niin a tarlang bawk.
Preliminary Enquiry report-ah Kolasib DIET Principal hlui hian Rs. 63,98,575/- chu hotu sang zawk te phalna lovin 'Other Charges (OC)' head atangin 'Office Expenses (OE)' ah a divert niin a tarlang a, sum hmanna zingah motor hire leh alloy wheel full set, Rs. 89,800 a lei chu Mizoram sawrkar thuchhuak kalh a nih thu a tarlan bakah kum 2013-2018 chhung khan hotu lian zawk te phalna la hmasa lovin lunch leh dinner atan Rs. 7,86,218 hman a ni chu dan kalh a nih thu a tarlang bawk.

Hetih lai hian Kolasib DIET chuan 2013-2018 chhung khan SCERT Aizawl atangin fund Rs. 186.35 lakh dawngin heng zingah Rs. 164.05 lakh chu 'OC' head atan leh Rs. 22.3 lakh chu OE head-ah a dawng a, heng te hi Kolasib District Treasury atanga lakchhuah niin report-ah hian tarlan a ni. Kolasib DIET Principal hlui hian refrigerator, television set, stabilizer te chu lei angin 'fake voucher' a siam a, 'fake canteen bill' hmang bawkin office ei in manah sum thahnem tak hman niin heng atana sum hman zawng zawng belhkhawm hi Rs. 5,22,205 zet a ni tih a tarlang bawk.