March 11, 2024 School eduation minister Dr. Vanlalthlana'n MBSE hnuai class X exam neih mek a, social science subject a zirlai thenkhat dikhlel deuh a suggestion lo petu chu suspend a ni tih sawiin, vawiin ah examiniation committee an thukhawm nghal dawn a, hemi paper bik a hmalak chhunzawm dan tur an ngaihtuah dawn tih a sawi.

Vawiin assembly budget session ah official statement siamin, education minister chuan, March ni 8, 2024 tlaiah HSLC exam a social science subject ah board exam a zawhna lo chhuak thei awm te enlawkna suggestion ang chauh ni si, board exam zawhna nen a inang deuh vek chu Govt, Mizo high shool zirtirtu pakhatin a zirlaite hnenah a pek thu social media ah a darh tih hriat a nih ve leh MBSE hotuten hma an la nghal tih a tarlang.

Statement a tarlan a nih danin, MBSE chuan MISSTA president Govt, Mizo high school heamaster leh zirtirtu inhnamhnawih nia rin chu ko nghalin, thu zawhfiah an ni a, zirlai naupangte pawh thu zawhfiah leh niin, Govt. Mizo high school zirtirtu hian suggestion chu a lo pe ngei a ni tih finfiah a ni ta a, he zirtirtu hian naupang zirna a chak lo bik deuh thenkhat a hran a zirtirna (special class) neihpuiin, suggestion darh chhuak ta hi pein, zirlaite hian an lo ziak thla hlawm a, zirlaiten an lehkhabu a suggestion an lo ziah thlak pawh evidence a tan kawlthat a ni.

Social science suggestion darh chiam a lang hi uluk taka chhui a nih hnuah nasa taka darh a ni lo hlauh tih hriat a ni a, a chhuahna school naupang pawhin an nei vek lo tih hriat a ni. Zirlai thenkhat special class kal tur a tih hi an kal vek lo a, a kalte pawh hian an lo ziak thla vek lem lo tih te pawh hriat a ni ta zel a ni. 

He thil thileng ngaihtuah hian minister hovin, 9.3.2024, inrinni leh 10.3.2024, Pathianni khan emergency meeting neiin, sawrkar chuan a ngaipawimawhin zialo a titakzet a, vawiin (11.3.24) ah examiniation committee an thukhawm nghal dawn a, hemi paper bik a hmalak chhunzawm dan tur an ngaihtuah ang. MBSE hnuaia class X exam hi chu routine pangngai angin a la kal chhunzawm dawn a ni.

Hetiang thil diklo lakah hian sawrkar thikthu a chhe thin hle a, tunhnai mai kum 2021 pawh khan hei aia buaina te zawkah pawh a mawhphurtu zirtirtu chu suspend a lo ni tawhin, a chungah action lak a ni. Dikhlel taka social science subject a suggestion petu zirtirtu hian sawrkar hnathawk a nih ang a sawrkar dan a zawm loh avangin a chungah action lak nghal a ni a, 10.3.2024 khan a hna atanga chawlh lailawk tir suspend nghal a ni a, hemi ni vek hian MBSE lam pawhin police station ah FIR an thehlut nghal a ni.

Dr. Vanlalthlana chuan he thil thleng hi education department in pawi an ti takzet tih sawiin, "Suggestion petu ngei pawh hian hetiang boruak leh mite ngaihven a ni dawn tih hria sela chuan a tih kan ring hauh lo, zirlai naupang suggestion lo dawngtute hi kan dem lo a, chhui zui a enzui zel pawh kan tum lo, zirtirtu sang chuang awm karah zirlaite hnena zawhna lo sawichhuaktu mi pakhat hian zirtirtu dangte nihna a tarlang lo tih hi mipuiten min lo hriatsak turin ka ngen takmeuh a, hetianga zirtirtute zahawmna tihmelhemtu lakah hian dan ang taka hmalak kan tum a, hun dangah pawh khauh takin hma kan la zel ang," a ti bawk.

"A zirtirtu pui rilru na tak tak an awm tih kan hria a, kan khawngaih takzet a ni, kan zirtirtute hi kan la ring zo tawk a, kum danga board examah pah kan ring chhunzawm zel dawn tih he house zahawm tak hi ka hriattir a ni," Education minister chuan a ti bawk.