India boxer chhuanvawr zinga mi Dingko Singh chu June 10, 2021 khan cancer avangin a boral a, a chanchin tarlanna film siam tumin Bollywood director ten ngaihtuahna an seng nghal. 

Hetiang karah hian tunge Dingko Singh lemah chang ta ang tih chu zawhna awm mek a ni a, a chhanna chu Shahid Kapoor a ni. Kum 40 mi Shahid Kapoor hian Dingko Singh a thih khan thlahna thu a lo tarlang tawh a, "Padma Shri Dingko Singh hi India rama boxer tha berte zinga mi a ni a, vawi eng emaw zat India tihming thatu a ni. Thangthar te tan chona thar siamtu a ni a, ka ui tak zet a ni," tiin a sawi. 

Shahid Kapoor hi Dingko Singh biopic-ah hian a inlan ngei dawn niin a ngaih theih a, a hun leh ni tur erawh tihchian a la awm lo. 

Kum 42 mi nia boral Dingko Singh hi Manipur boxer niin, 1998 Asian Games, Bangkok-ah khan gold medal a hnek chhuak a, kum 2013 khan India rama civil mite chawimawina sang Padma Shri hlan a ni.