Aizawl : July 20, 2021 khan Chief Secretary Conference Hall-ah Health Minister Dr. R Lalthangliana, Medical Operation Team Chairman Dr. ZR Thiamsanga ten chanchin thehdarhtu te an hmachhawn a, hemi tum hian Mizoramah 'Discharge Protocol' thar hman a nih tawh tur thu an sawi. He protocol tharah hian Local Level Task Force (LLTF) te lamah ngaihdan a phir nghal a, quarantine te chhuahtir dan pawh a inang lo fur a, a tir ngaihtuah chuan sawrkar kalphung hmang an pung chho ve ta hret hret.

Hemi tuma tel, bakah Dr. C Lalhrekima leh Dr. J Lalramchhuanga te pawhin Mizoram chuan Indian Council of Medical Reasearch (ICMR) leh World Health Organization (WHO) ten kum khat chuang kalta atanga an lo hman tawh, khawvel ram tam zawk leh India state dang te pawhin an zawm mek, Covid-19 vei enkawl te an dinhmun a zirin test kher lova chhuah zalen an nih tawh tur thu an sawi a, zawm diak diak erawh a ni lo.

ZALEN in veng hrang hrang a biak pawhnaah sawrkarin discharge protocol a siam hi zawm lo an la tam zawk niin a ngaih theih a, quarantine center-a awm te chhuahtawp hi chu sawi tham lek an awm. Dinthar veng leh Bethlehem Vengthlang chuan discharge protocol hi a nih ang angin an hmang a, an awm hun chhung a zawh chuan an sezawl chhuah tawp a, chutihrualin Dinthar lam hi chuan a duh tan chuan RAgT test an tih sak a, man chawi a ngai thung.

Armed Veng hian tih dan hi a danglam hret a, quarantine atanga an chhuahtir te hi an test lem loh rualin in lamah ni nga inkhung leh turin an ti thin a, inkhungna tur remchang lo te chu Armed Veng Presbyterian Kohhran Hall-ah ni nga an awm tir leh a, an ei leh in hi an chhungten an ngaihtuahsak thin.

Electric Veng chuan an veng bil hman tur Kiosk an nei a, quarantine zo tawh te chu he hmunah hian an test tir leh a, an positive chuan an chhuah ngai lo. Hei hi an veng mipui duhdan leh damlo tam zawkin an duhdan a nih thu an sawi.

Chaltlang Lily Veng hian an 4C-a an enkawl te chu an chhuah tir dawnin RAgT test an neih tir ziah tih an sawi. Veng dang 3C leh sawrkar 3C a awm te hi tunhnaiah chhuak an neih loh avangin engtianga kalpui tur nge tih an la tih chian loh thu a sawi a, rawn chhuak tur te chu Kiosk-a in test tura an hrilh thin thu an sawi.

Venghlui chuan ZMC, 3C leh 4C a awm te chu an awm hun chhung a zawh hnuin ni 7 chhung in lama inenkawlna an neih chuan an quarantine a, in lama inkhunghranna nei lo te chu community quarantine centre-ah an dah thin.

Heng veng te baka ZALEN in a biak te chuan sawrkar thuchhuak hi an zawm hlawm lo a, hei hi an veng chhung mi te leh damlo te duhdan an zawm vang niin an sawi a, heng veng te hi vei tam lutuk lohna leh hmunhma nei tha te an ni tlangpui a, RAgT test kit mahni-a intumchawp an ni vek bawk.