Tunhnai mai khan Minister PHE changtu Zodintluanga chuan Engineer te hun hmapuiin zawhna ngaihtuah chhunzawm tlak tak; hlawh phu loa in leh lo ropui tak tak nei an awm em? in enlet a tul em? tih leh officer intawh khawmnaa insawisel kan hreh lutuk chuan thil thar a chhuahtir mai nilovin inup awm thei nia a hriat thu a sawi a. Forum awm ang angah chuan a tha ber zawn nan sawi hoa inhnial bap bap hun a tih thu a sawi bawk a ni. Sawrkar anga kan inrelbawlna fumfe kan neihna a la rei lo hle mai a, tu huatthu va ni suh department thenkhat te phei chuan an hmazawn an hltir lemlo emawni tiin a thlirtu tan a ngaih theih rum rum a, hmabak a la ko hle a ni. Kum 30 kalta thlir let ila hnathawh emaw hnachelh ang zelin sawia inhmeh a awm thin a. Chung zinga sawi hlawh ber pawl chu Engineer te an nih a rinawm. A ni lah taka puanhnuai thil tih Pawisa lo ngaih thin an ni a, tam tak chu mi rinawm tak tak an nih laiin tling loa sum la hreh lo ho vang hian mipuiin an phek en phah fo reng a ni. Mi takah chuan in ropui lian tak tak te chu sawrkar hna thawklo mahni kea ding te an ni a, kan ramah chuan engineer chauh nilo officer ni chin chuan in leh lo an din khong for uah a, chutianga sa ve lo an tlukpui te chu rilru nei loah ngaih an ni lek lek hial a nih kha. Mipui pawhin eiru nia kan hriat te chu an hnung lamah sawi thin mah se ‘sum ngah ngah hmeltha’ an tih ang deuhin thenkhat chuan an be chhe phal chuang hauh lo. Rilru takin kuttlingloa sum lakluh hi ‘hmuhsit’ a, a tul a nih chuan thinhrik hial pawha khawtlang leh kohhran lam atangin inzirtirna in pek a la tul hle. Hetih rual hian Sawrkar officer/ engineer In nei tha zawng zawng hi eiru an ni kher loa, hamthatna eng eng emaw an dawn bakah ‘loan’ hmanga chenna in tha zahpui awm lo din an awm tih hriat hmaih lo ila a tha ang. PHE Minister-in a sawi zingah hian ‘sawihona dawhsana sawrkar hnathawkte chuan an ngaihdan an sawi tlem’ tih hi a dikin a rinawm a, Mizo ziaa bet a nih loh pawhin sawrkar hnathawk hmasate’n tihphung ah neiin chhunzawm zel in ‘culture’ angin a insiam nghet ta a ni thei bawk. Kan hnam nih phungah midang hmai zah pena chi kan ni hrim hrima, khawtlang tangkai loh pawha hnawksak nih loh hram hram kan tum thin a, mi pawi sawi hreh tak, ngaihdan sawi hnem lutuk chuan midangin eng emaw angin min ngaih hlauhna kan nei lian hle. Sawrkar hnathawkte’n an thawhna hmasawnna tur sawi an hreh hian chhan dang a nei thei tho mai a, thlatin hlawh la, a dawt leh pawh ngaihtuah hah ngailemlo an ni a, hei hian a ti thlamuanga, hmasawn tumna an tlachham theih bawk. Chutih rualin hnaa kaisan leh thilo dang neuh neuhah office pakhata thawkho ni si, inngeih thei miah loan awm leh lawia; thenkhat chu inhmanhnawih duhlovin ngawih chuha ‘pension’ hun nghah thlang zawk an ni thei bawk. A chhan leh a vang chu eng pawh nise tunlai khawvel angah chuan hetiang hian a kal reng theih tawh loa, thil tha chhuak tur chuan sawihoa innawr bap bap chang awm zawk tur a ni. ‘Ngawih’ hi rangkachak an ti thin nangin engkimah a dik vek thei bik lo tih hriatthar a pawimawhin a lang. Hnam fing apiangin thil an sawiho hnema, a tha zawk a chhuah an beisei vang a ni. Mahni ngaihdan leh dik nia an inhriatnaah chuan huai takin an tang a, hmaisena in nawr tum te pawh a awm ta ve ang; mahse sawi hun a zawh hnuah chuan pangngai takin an awm ve leh mai thei zel! A bikin engineer te hi thiamna hran nei an nih avanga sawrkar in a rawih te an ni hlawm a, mi nazawngin an thawh ang hi an thawk thei meuh lo a; tawnhriat leh rilrua vawn sa an neih angte sawi ho loa kaldan pangngai renga an kal zel a nih chuan thiamna chhuak thar chhawr tangkai lovin a awm dawn tihna a ni a. A ruaitu beisei an pha lo mai nilovin rawih an nih chhan letlingin an awm ti ila a sual tampui lo ang. Kan ram angah chuan Sawrkar hi hna pe tam thei ber a nih avang leh ram rethei kan nih avang bawkin Sawrkar hna a tam zawk chuan an beisei fo thin. Sumdawnna lian Corporate te kan ramah an rawn inhung ve tan tawh a, hmasawnna duhin thil tam tak an sawi hoa, a hah pawh an hah reng a ni. Thil thar sawiho tur hre lo mah se ‘a thar ngaihtuahna hun’ (brainstorming session) an uar a, rilru sawr bingin thlen chin atangin hmasawn an tum tlat thin a ni. Public Health Department chuan 'sms' hmangin khawpui chhungah tui haw ni leh a hun mipui a hrilh thei tawh a, hei ho hotea lang mahse mipui tana samkhai si a ni a. Tui Tunhma te kha chuan tui herhhawna bulah tuipu changin mi tamtakin hun an paih a, nileng hna a nih chang a awm fo a ni. Eizawnna vanga in nghak nei lo tam tak tan buaipui tham a tling hial a, tui liam zawih zawih khawpa dawng an awm laiin hmu mang lo emaw an awm leh lawi a; ‘tuipu’ te biak that an ngai a, therhlo leh eng eng emaw tha lo a pian phah fo a nih kha. Tuna kalphung thar pawh hi sawi hona atanga lo piang niin a rinawm a ni. Hemi vang hian'service provider' lamin sum an hmuh phaha, Department tan a samkhai em em bawk a; tha leh sum tam tak hum a nih a rinawm hle. Ngaihtuahna lian lemlo takin thil kalphung a tha zawngin a thlak danglam chu a ni ber e. Mizo thluak hi a thatlohna bik a awmin a rinawm loha, kan awmna hmun a chhengchhiaa, a kilkhawr bawk vangin ram dang kan pha lo mai chauh a ni thei a. Sawrkar hnathawk te hian an thawhna office hmasawn tir hi an mawh a ni a, rilru inhawng taka hmalam hun thlirhona nei tam sela; an thawk tha emaw a chhia emaw pawh nise a nghawng tur chu kan ram, a chhunga cheng mipui te bak an ni chuang lo a. Hemi kawngah hian rilru tihzauh kan mamawh tawh hle a ni ang e.