DOWNLOAD OUR APP

Read latest news on your phone
app-store

Disha Ravi

Jul 03, 2021

Sik leh sa inthlak zel tur venna kawnga beitu, climate change activist niin, Fridays For Future India dintu a ni

Lo neituten India sorkar dan siam thar duh lohna an lantirna an kal hun laia hmeichhe pakhat hming lang, an man avanga lar ta em em, Disha Annappa Ravi hi a la naupang a, sik leh sa inthlak zel tur venna kawnga beitu (climate change activist) niin Fridays For Future India dintu a ni.

February 13-ah mai khan khawvel hriat hlawhin a rawn inlar a. Amah ang bawka sik leh sa inthlak nasa bei lettu, Greta Thunberg-in internet hmanga lo neitute duh lohna lantira a thlawpna lantirna pakhat, online toolkit an tih mai kaihhnawihah man a ni a, a lar ta hluai a ni.

Indian sorkar chuan toolkit tia an saiw mai hi khawtlanga intluktlanna tichhe thei nia sawiin he thil thehdarhna lama a lo tel avangin an man a. Man a ni ta mai hi mi tam takin an dem a, India ram mai ni lo, ram dang atang pawhin India sorkar demna a ring hle.

Ravi-i hi Bangalore, India-a mi niin sik leh sa inthlak nasa tihtawp nana Fridays For Future in India (FFF India) dintu zinga mi a ni a. The Quint-in a tar lan dan chuan FFF Movement-a pek pakhat, MAPA wing-ah pawh a inhmang nasa hle a, MAPA hi Most Affected People & Areas tihna niin khawvel chhim lam, ram thang mek an tih zinga carbon emission tichhuak tam lutuk leh sik leh sa inthlak nasa lutuk beih letna a ni.

Auto Report Africa-in an kawmnaah chuan Ravi chuan, “Sik leh sa lama thianghlimna beihna hi ka pi leh pute atanga ka rochun a ni a, anni hi lo neitu an ni a, sik leh sa avang hian an buai nasa thin hle a ni,” tiin a sawi a. “Hetih hun lai hian sik leh sa avanga harsatna awm theite hi ka lo hre thiam chiah lo va, a chhan chu kan chenna laiah hetiang hre khawp turin zirna kan nei lo vawk a ni,” a ti.

Ravi-i hi khawtlanga zirtir ngai zualte zingah a inhmang nasa hle a. Sik leh sa inthlak beih letna kawngah hian khawvel ram dangah chanchinbuah te pawh thu thahnem tak a lo ziak tawh a. September 2020 British Vogue magazine-ah khan vun rawng hrang hrang pali, sik leh sa inthlak nasa bei lettu lar zingah pawh a lang tawh a. February 15, 2021 pawh khan The New Indian Express chuan ‘Bengaluru’s Greta’ tiin a hming leh phuahin a chanchin an chhuah nghe nghe.

Share now