Aizawl: Health Minister Dr. R. Lalthang-liana chuan, "District 3 kan puan tawh Hnahthial, Khawzawl leh Saitualte hi District tihpuitlin a nih theihna turin thla leha Budget Session hmasa ber kan neih turah a function theihna turin chumi atana sum mamawh chu budget-ah kan dah ang,” a ti.
Dr. R.Lalthang-liana hian a bial chhung a fankualnaah thu sawiin, “District 3 kan function turte hian kum 5 chhungin kawr an hak tur ang ang chu ha kimin fuke kim an nei vek ang a. District kan tihpuitlin hunah chuan a huam chhunga department awm sate tilianin a tul ang zelin department dang pawh hawn belh a tul zel dawn a ni,” a ti.
SEDP chungchang sawiin, “Thla leha budget session kan neih turah hian a bul tan nan a ‘chi’-ah cheng vbc 1000 tel kan dah dawn a, SEDP hi a thawk tak takte tan chauha dinchhuahna tur a ni a. SEDP hi Project Base-in kan kalpui dawn avangin NLUP anga sem, duh duhna a hman theih ang khan kan kalpui ve dawn lo a ni,” a ti bawk.
Health Minister chuan tun hnaia ZPM thu chhuahin MNF chu mipui buma an puh chungchang chu chhangin, Blood Processing Fee chu January ni 14-a Council of Ministers Meeting neihah notification tichhuakin sawrkar damdawi in atanga lak thin chu tihtawp a nih tawh thu a sawi a. Goverment Hospital-a admit-te chauh an free-sak a, private hospital-ten Civil Hospital-a thisen an lei chhawn ang hi a huam rih lo tih sawiin sum awm dan a zirin private hospital-a blood processing fee lak chu la ennawn leh tur a nih thu a sawi bawk.
%%%%