Parliamentary panel chuan India ramah police hmeichhia an tlem tak zet tih sawiin 10.3% emaw chauh an ni tih a sawi a. Hmeichhe hlang awmna (all-women) police station chu district tina din turin a rawt bawk.

Congress hruaitu, Anand Sharma kaihhruai Parliamentary Standing Committee on Ministry of Home Affairs (MHA) chuan police-a tang zinga 33% tal hmeichhia an nih theih nana ruahmanna an siamte an tichhuak.

"Committee chuan ram chhunga police zingah hmeichhia an tlem em em a, 10.3% chauh an ni,” tiin Parliament-a report an thehluhah an tar lang.

Panel hian MHA chuan state leh union territory tina district zawng zawngah hmeichhe hlang awmna police station din se tiin a rawt bawk.

Committee chuan hmeichhe police lak hi post thar siam aiin mipa constable hmun ruak awm chu hmeichhe tana ruahmanna police-population ratio inmil tura tih ni se tiin an rawt bawk.

“Police-a hmeichhe awm zat tihpun bakah hian defence force lamah pawh  hmeichhiaten ralbeihnaah thil an tithei a. MHA hian state leh UT-te hi police-a hmeichhia tam zawk thawktir turin kan ngen a ni,” a ti.

Committee hian MHA chu state leh UT zawng zawnga police station tinah sub-inspector pathum leh constable hmeichhia 10 theuh dan turin a rawn bawk a. Women’s help desk pawh nileng zankhuaa awm turin a ti bawk.