Uttar Pradesh mi, Hindu kûtpui, Diwali hmang tura an khaw lam pana haw mi 15 vel chu Madhya Pradesh-ah an chuanna bus-in truck a sut avangin an thi a, mi dang 40-in hliam an tuar bawk.

Madhya Pradesh-a Rewa kawngpui zauva chhiatna thleng a ni a, bus-ah hian passenger 100 chuang zet chuangin Uttar Pradesh-a Gorakhpur pan niin Suhagi Pahari bul, Rewa-ah Zirtawpni zan rei tawhah lehkha phur truck nen an insu a ni.

Hliam tuarte hi Suhagi-a damdawi inah kalpui nghal an ni a, a na zualtu chu Rewa-a Sanjay Gandhi Memorial Hospital-ah lak an ni.

Thuneituten an sawi dan chuan an sut truck hi truck dang nen an intawhsual avangin kawngah hian a lo ding sa a, bus hian an hnung lam atangin na takin a su ta niin an sawi.

Navneet Bhasin, Rewa Superintendent of Police chuan bus-a chuang tam zawk hi inhlawhfa, Uttar Pradesh mi niin Madhya Pradesh-a Katni atanga Diwali hmang tura hawn an ni tih a sawi.

Hindu sakhaw kûtpui ber, Diwali hi Thawhtanni a ni.