Doja Cat

Admin - Jul 17, 2021

‘Kiss Me More’ a larpui

A hming atang ringawt chuan Indian thisen kai ni awm tak, stage lamah chuan Doja Cat tia hriat, Amala Ratna Zandile Dlamini hi tun lai hian SZA nena an sak dun, ‘Kiss Me More’ chu a larpui hle a. Billboard Hot 100 lamah pawh tunah hian No. 4 a nihpui mek.

October 21, 1995-a Los Angeles, California dai, Tarzana-a piang hi a nu chu Jewish-American niin painter a ni a. A pa hi Dumisani Dlamini a ni a, South African lemchang thiam a ni a, composer leh film producer a ni a, Zulu hman a ni a. Kum 1992 musical film Sarafina!-ah pawh khan a chang a ni

Doja Cat hian a pa hi a puitlin hnuah chauh a hmu niin a insawi a, a pa erawh chuan phain a fanu nen hian an inkar a tha hle niin a sawi ve thung.

American rapper, zaithiam, hla puah thiam leh record producer ni bawk hian a tleirawl laiin SoundCloud hmangin a hla a tichhuak a. A hla zinga pakhat, ‘So High’ chu Kemosabe leh RCA Records chuan lo ngaithla fuhin kum 17 a nih chuan an pahnih hian contract an ziahpui thei der a, kum 2014 khan a EP hmasa ber, ‘Purrr!’ chu an tichhuak ta nghe nghe.
    Rimawi khawvel a\angin Doja Cat hi a’n chawl zawk a, a studio album hmasa ber, ‘Amala’ chu kum 2018 khan a tichhuak leh ta chauh va. A hnu lawkah internet meme an tihah a single, ‘Mooo!’ chu a lar ta chiam a, hei hi deluxe version-in a album hmasa berah a telh kha a ni a, a album-ah hian ‘Juicy’ leh ‘Tia Tamera’ (Rico Nasty nena an sak) pawh kum 2019 khan single-in a tichhuak bawk.
    Doja Cat hian a studio album pahnihna chu kum 2018 khan a tichhuak a, ‘Hot Pink’ hi a hlawhtlinpui ta hle a. US Billboard 200-ah Top 10 kaipuiin a single tihchhuah, ‘Say So’ chu Billboard Hot 100-ah No. 1 a ni pha hial a, hei hi Nicki Minaj nena an sak dun a ni.
    Nikum khan Doja Cat hian Ariana Grande thawhpuiin ‘Motive’ tih hla an tichhuak a, Grande nen bawk hian ‘34+35’ tih siamin Megan Thee Stallion chuan a pui bawk a, Billboard Hot 100-ah Top 10-ah a lang phak leh a ni.
    Tun lai hian SZA nena an sak dun, ‘Kiss Me More’ chu a hit chho leh mek a, hei hi a album pathumna, kumina a tichhuah, ‘Planet Her’-a a single tihchhuah hmasak ber niin Billboard 200-ah No. 2 a kai phak hial.
    Doja Cat hi music video leh hla siam thiam niin social media lamah pawh TikTok leh YouTube-ah hriat a hlawh hle a. Grammy Awards dawng tur leh Billboard Music Awards dawng tura chhawpchhuah pawh a ni tawh.

Share now