ZALEN, August 19, 2025: LPS Vision Production buatsaih, Mahindra XUV 3XO Mizo Talent neih meka boruak nei lian ber zinga mi, phenglawng tum thiam Lalrinawma chu Doordarshan Aizawl-in an programme-a tihchhuah turin an tumtir.

Thudawn danin a hmain Doordarshan hian Nalzawl rawlthar hi an hre ngai bik lo va, Mizo Talent-a a inpho chhuah atangin an programme-a tihchhuah atan phenglawng tum tur hian an sawm a, Thawhlehni khan recording pawh an tihtir nghal a ni.

Mizo Talent intihsiakna kalpui mekah Top 10-a tlingte chu Thawhtanni zan khan puan a ni tawh a, mitdel ni chunga phenglawng tum thiam, Rinawma pawh hi telin intihsiakna sang zawk a hmachhawn leh thei tur chu social media-ah lawmpuitu a ngah hle.

Top 10 intihsiak hi Ningani zanah LPS Arena, Falkland, Aizawlah neih a ni dawn a, LPS 1-ah live-in pek chhuah a ni ang a, an YouTube channel atanga live-a thlir duh tan member nih a ngai dawn a, intihsiakna hmunah chhim theih a ni dawn bawk.

Mizo Talent hian ngaihhlut a hlawh mek a, Top 10-a tlingte puan a nih hnuah a tling zo ta lote vuipui thawm pawh a ring hle a. Magician Lalrama a tling zo lote chuan mi tam tak mak tih a hlawh hle a ni.