February 6, 2023; Naktuk atanga Mizoram Legislative Assembly Budget Session neih tan turah, tunhnai a minister leh MNF party primary member atanga chawlhtir, MNF ticket a Siaha bial atanga thlantlin Dr. K. Beichhua chu treasury bench lamah a thu dawn lo nia thudawn a ni.

ZALEN thudawn danin, Dr. K. Beichhua hi Siaha bial ah MNF ticket a thlantlin nimahse, sawrkar lai MNF ministry ah chanvo a neih tawh loh avang te, party atanga chawlhtir a nih tawh vangte in, naktuk atanga neih tan tur Mizoram Legislative Assembly Budget Session ah kum 4 chhung vel a lo thut tawhna treasury bench lamah thu tawh loin, opposition bench lamah a thu dawn a, Dr. BD. Chakma thutna bulah thutna pek a ni dawn.

Minister hlui Dr. K. Beichhua hi kum 2018 a MNF ministry in sawrkarna an siam atangin Minister of State dinhmun chelhin, Excise, Sericulture, AH&Vety leh Social Welfare department te a enkawl thin a, nikum December ni 13 khan chief minister in thehlut tura a tih angin, minister atanga banna a thehlut a. Chumi hnu-ah kumin January ni 25 khan MNF primary member atangin chawlhtir a ni.