Mizote’n ze pakhatbuaipuiawm tak kan neih chu – thu hi kan awih sam lutuk a, han finfiah tum hmasa lem lo hian dawt ngal ngat pawh hi kan awih leh mai thin. Kan insawithaih a, nambar 666 hlau em emte an tam a, UID hlau lah chuti bawk.Tunlai hianWhatsapp lamah BJP sawichhiat duhna vang nge central sorkar duan ‘Draft National Education Policy 2016’ sawichhiatna a darh viau a niawm a. BJP duan ‘Draft National Education Policy 2016’ hi Minority Kristiante tan a hlauhawm em em a, Kohhran sikul zalenna chhuhsakna kawng a ni a, Kohhran sikul thuneihna laksaka an zirtirtute pawh state hrang hrangah transfer theih an ni dawn a, Hindi hi compulsory-a zir a ngai ang a, yoga pawh compulsory a ni ang a, English pawh hi optional (duha lak a, duha lak loh) mai mai theih a ni dawn a ni ti a thu thehdarh an awm leh ta! He thu vawrh darhtu hian a vei zawk nia lang chu - Mizo Kristiante lehKohhrante thinlung khawih zawng taka thu han thehdarh a, BJP han sawichhiat pah a tum ni berin ka hmu. He ‘Draft National Education Policy 2016’ hi kan chhiarchhuah dap chuan “BJP-in a duan Education Policy” a tihah hian hlauhawm a sawite kha an chuang miah lo va, kan ram tan pawh a thil tha tur a inziak teuh zawk zu nia! English thiam tan chuan Internet (mhrd.gov.in/sites/upload_files/mhrd/files/Inputs_Draft_NEP_2016_0.pdf) atangin a hmuh theih vek a ni. Chipchiar zawka kan sawi hmain India Danpui (Constitution) atanga he Whatsapp-a thu thehdarhtuin hlauhawm tak niawma a sawite hi hlauhawm thei an nih lohzia i sawifiahphawt teh ang. Pakhatnaah chuan, Education hi Central Subject (Central sorkar tih tur bik) a ni lo va, Concurrent List-a mi a ni. Central sorkarin a duh dan dana a kawh kawi mai tur a ni bik lo va, State sorkar a palzut ringawt thei lo. An pahniha thutlukna siam dun ngai a ni. Chuvangin kan state sorkar, Kristian vekte hian tan an lak chuan hlauhawm a awm thei lo phawt! Pahnihnaah chuan, MNF leh India Inremnain a hrin – Indian Constitution Amendment (siamthatna) vawi 53-na, Article 371 G-ah chuan “No Act of Parliament in respect of (I) religious or social practices of the Mizos; (II)Mizo customary law and procedure; (III) administration of Civil and Criminal justice involving decisions according to Mizo Customary law . . . . . . . shall apply to the State of Mizoram unless the Legislative Assembly of Mizoram by a resolution so decides” tiin a inziak a. A awmzia chu Parliament-in Dan a siam reng reng Mizote sakhua leh khawtlang tih dan leh Mizo customary law khawih thil, Civil leh Criminal thuchhe remna reng rengah ‘Mizoram Assembly-in he dan hi a pass ve loh chuan Mizoramah hman theih a ni lo’ tihna a ni. Draft NEP 2016 Chapter 4 (4:12(1))-ah hian games and sports te, NCC, NSS, art education, etc. zingah yoga hi a lo lang ve a. Yoga tih ve (practice) hi he Draft NEP mai ni lo Parliament thurel thluk (Act) meuh pawh ni se, yoga zirtir hi Mizote chungah tihluih theih a ni lo. He yoga exercise hi Hindu sakhaw thil tih, an pathian hmingte chham (mantra chanting) a ngaih avangin kan Kohhran inzawmkhawmpawlte pawhin tha an tih loh avangin ‘kan sakhua nena inmil lo ve’ tiin Aricle371-G hmang hian hnawl mai theih a ni. ‘A sen reng reng chu hlau zel ang che, Kawlkei a ni e’ tia a nupuiin a fuih avanga Chhura’n hnahthel sen mai mai pawh fei nen a bei ta mai ang khan, at hi so so tur a ni lo. MNF leh India Inremna dan avanga India Constitution Amendment (Article 371-G) khan min hum chiang hle a ni. Whatsapp-a ziaktu khan Minority Kristiante tan a hlauhawm em em, Kohhransikul zalenna chhuhsak a ni ang, kohhran sikul thuneihna pawh laksakin an zirtirtute pawh state dang dangah an transfer mai ang a tihte kha chu a phuahchawp mai mai, politics taka BJP a sawichhiatna mai a ni e. Hindi compulsory a ni ang tia zirlaite a han sawithaihte kha a dawn tawi lu deuh a ni. Tuna Mizote harsatna hi Hindi kan thiam lo lutuk hi a ni zawk a. Tuna kan Governor zahawm tak pawhin Mizote harsatna lian tak pakhat chu tawng, Hindi te, English te an thiam lo em em mai hi a ni a tih kha. Tun aia nasa zawka Hindi hi zir a, mahni lu leng tal sawi kuak theihna tur khawp kan thiam hi a tul lutuk tawh zawk a ni. Insawithaih tur a ni lo. India ram atang hian kan Independent dawn lo va, Silchar pelh atang khu chuan English aiin Hindi a tawng theih hi a tangkai zawk daih a ni. Chubakah, Hindi hi compulsory-a zir a ni ang tih kherin he Draft NEP 2016-ah hian ziak pawh a ni lo. Tuna kan zir aia effective zawka zir theih ni se a duhawm hle ang. English hi optional (a duh tanalak theih, a duh lo tana lak loh theih) tihte kha khawia a hmuh nge maw ni le!? Draft NEP 2016, Chapter 4 (4:11(2))-ah khan nationally leh internationally-a English a pawimawhzia a rawn sawi a, naupangte’n English ziak leh chhiar an thiam tulzia te, pawl 10 thlenga mahni hnam tawng emaw awmna hmun emaw mahni bial tawng zirte chuan tawng pawimawh pahnihna atan English an zir ngei a that thu a sawi a ni. English hi a dah pawimawh em em zawk a, optional subject-a dah hniam tumna lam a ni lo! Hun liam ta lamah khan Saffronisation of Education tih kha BJP vawm nan a hmangtute’n an hmang nasa hle a. Mahse Prime Minister Narendra Modi-a kaihhruai BJP-ah hian saffronisation (tih-Hindu) lam a leng ta lo; ‘Development (Hmasawnna), Development (Hmasawnna), Development (Hmasawnna)’ tih hlir a ni ta! “He Draft NEP 2016 hi intihluihna (mandatory) ni lo mah se kal dan tur tha inkawhhmuhna zau tak. .a ni” tiin Bishop Theodore Mascarenhas, Catholic Bishop Conference of India-a General Secretary chuan a fak a. “Sakhaw tih bik nei (It would not compromise on pluralism) a ni lo” a ti. (The Indian Express). Thu dik tawk lo, phuahchawp leh politics tum nei rana thil sawi hi Mizo Kristiante hian i hawisan tawh teh ang u. Dawt ni lovin thu dik zawk hi kan hnam damna tur a ni e.