Aizawl June 28, 2024 : Kolasib district a Dragon fruit tharchhuah te sawngbawl a, hlu zawka siam leh rei zawk dahthat a nih theih nan hmalatu Dragon Fuit Tui sawra sawngbawlna kalpuitu Kolasib Agro Marketing Cooperative Society Ltd (KAMCO) chu MJA Kolasib District te chuan an tlawh.

KAMKO te hian Tanky an neih tam loh avangin kumin chung hian Quintal 80-100 vel bak an lei theih loh tur thu MJA te hi an lo hrilh a. KAMCO Society hian kolasib dist a farmer te tharchhuah Dragon fruit leiin an sawngbawl a, Dragon fruit an leikhawm dan leh an sawngbawl dan te KAMCO hruaitu te chuan MJA te hi an lo hrilhfiah a ni.

KAMCO Society Chairman R Lalhmingthanga sawi danin, an Society hi Kuthnathawktu te tana din niin, kum 2022 kumtawp lam khan an din tana, kuthnathawktu te hlawhtlinna in a nawr avang te, FOCUS Mizoram, Cooperative Society leh Horticulture Dept ten an thlawp that avangin kum 2 pawh a pumhlum hmain Kuthnathawktu te tan an che chhuak thei chu lawmawm an tih thu a sawi.

Hetihlai hian Dragon fruit tui sawra sawngbawl tur hian Horti Dept leh Science & Technology dept te be rawn chungin an Society din hma atangin Trial process an lo kalpui tawh thu leh, Trial process atanga Sample Product an siamchhuah te pawh Mizoram chhung Official Agri & Horti Fair ah tum hnih ngawt an phochhuah tawh thu te, Delhi thleng pawha an in phochhuah thu te a sawi bawk.

KAMCO Society hian hetianga Dragon fruit tui sawr an kalpui chung hian a Fruit hralh turin hma an la meka, Shillong Guwahati leh Agartala ah hnamdang sumdawng lian te dawrin Dragon fruit hralhna kawng an dap renga, Fur ruahtui avanga kawng chhia leh harsatna dang te avangin tun dinhmunah an la thawnchhuak thei lo tih sawiin, kumin chhungin state pawna thawn chhuah theih ngei an beisei tih an sawi bawk.

Kolasib district hi Mizoram-a Dragon fruit tharchhuak hnem ber niin, nikum khan Quintal 800 chuang an tharchhuak a, kumin ah hian quintal 1000 chuang tharchhuah an beisei.