Aizawl April 25, 2024 : Social Welfare and Tribal Affairs Dept.(SW&TA), Govt. of Mizoram leh SELCO Foundation (SF) te chuan Vawiin April 25, 2024 khan Aijal Club-ah meeting neih a ni a, state chhunga Decentralized Renewable Energy (DRE) hmanga livelihood sector tih hmasawnna atana thawhhona tha tak an neih theih nana he hun hi buatsaih a ni.

He hun hi Lalnuntluanga Colney, State Lead, SELCO Foundation (SF)-in state chhunga eizawnna tihchangtlunna leh boruak inthlak danglamna tih ziaawmna kawnga Sustainable renewable driven approach pawimawh zia sawiin tanna hun a hmang.

Social Welfare and Tribal Affairs Director Dr. Lalhriatzuali Ralte, IAS chuan dept. schemes, policies leh programmes awm tawhte nena DRE solutions hmanga eizawnna tihchangtlunna kawnga hlutna belhchhah theih dan tur te a sawi a. Directorate of Social Welfare & Tribal Affairs hnuai ah rualbanlo te leh hmeichhe chanhai leh rahbi tleu te tan puanthui zirna a awm thu sawiin heng an puanthui khawl hmanga solar energy hman tura hmalak kawngah leh training centre tihchangtlun kawngah SELCO nena thawhho a beisei thu a sawi. Dr. Lalhriatzuali Ralte, IAS chuan “Kan thawhho that chuan Renewable Energy Driven Solutions hmangin Mizoramah grassroot solutions ti chakin, thui tak kan ti hlawhtling thei ngei ang” a ti.

He hunah hian sumdawnna lama DRE Solution (Solar Sewing Machine) hmang tawh hnen atangin a experience te ngaihthlak a ni bawk. Puanthui F. Lalremtluangi chuan, “Ni zung chakna hmanga puanthui khawl (Solar sewing machine) hmang hian tunah chuan current a awm loh chang pawhin harsatna awm lovin hna ka thawk thei ta” a ti.