Aizawl October 5, 2024 : Raymond Remlalmuana (Raymond Colney) leh Andrew Vanengmawia (Drew Pachuau) te chu Asia khawmuala Film Festival hriathlawh leh lian pawl ber te zinga mi Korea khawpui pakhat Busan-a neih thin Busan International Film Festival vawi 28-naah an tel.

Mizoram aiawh turin Information & Public Relations Department chuan anni pahnih hi an thlang a, an kalna tur senso chu Ministry of Information & Broadcasting leh National Films Development Corporation (NFDC) in an tum dawn a ni.

Busan International Film Festival a tel turin hmarchhak state tin atangin film siamtu (film maker) 2 theuh thlan a ni a. 2023 pawh khan Ministry of Information & Broadcasting chuan hmarchhak state tin atangin film maker 2 theuh Cannes International Film Festival chhim turin an lo hruai tawh a. Chumi tum chuan Napolean RZ Thanga leh Aldrin Zosangliana te an zuk kal a ni.

Busan International Film Festival hi October ni 2, 2024 khan tan niin October ni 11 ah a tiak dawn a, hmarchhak film maker te hian ni 5 chhung festival an chhim dawn a ni.