March 18, 2022; Tukin zing dar 8:45 bawr vel a Durtlang Mualveng a detonator (kep) puak vanga chhiatna thlengah he thu buatsaihlai, March 18, 2020 chawhnu dar 3 thlengin mi 3 an boral tawh a, hliam tuar pakhat Synod hospital, Durtlang ICU a enkawl mek pawh a dinhmun a tha lo.
    ZALEN thudawn danin, Selesih - Durtlang road, motor workshop a vanduaina thlengah hian workshop neitu Lalhmangaihzuala (Buanga), Durtlang North leh a mi chhawr Lalthafamkima, Thuampui, Aizawl te chu a hmunah an boral a, damdawiin thlenpui a nih hnuah Lalmawikima, Sakawrdai a boral a, tun dinhmunah Tangsawrai, Damparengpui chu ICU ah enkawl mek a ni.
    Vanduaina tawk a boral Lalmawikima leh Tangsawrai te hian tukin khan an motor (pik up) siam tir turin Buanga workshop ah an lut a, motor an siamlai leh welding lam an khawihlaiin pik up a puak thei lam thil (detonator) an phurh chu mei si perin a dep fuh nia hriat a ni tih thudawnna chuan sawiin, pik up ah hian detonator dang pawh an phur nual nia hriat a ni a, hengte hi police lamin an la (man) vek tawh nia thudawn a ni.
    He thil puak hi a tirah chuan workshop a an hman welding na gas puak nia ngaih a ni a, amaherawhchu enfiah a nih hnuah gas puak a nih loh thu thudawnna te chuan an sawi. Chhiatna thlenna hmuna awmte an boral avangte leh hliam na tak tuarte an la nih avangin thu zawhfiah mai tur an awm lo a, thu leng vel hrang hrang pawh hemi vang hian a tam phah hle a ni.
    He chhiatna hian thil puahna hmun hnai vai a awm In 14 emaw vel a nghawng a, tukverh darthlalang keh te, in bang khi te a awm nual a, in thenkhatte phei chu riah chhuahsan ngai hial turte pawh a awm dawn nia thudawn ni bawk in, vawiin lam hian khawtlang hnatlang neiin, a theih ang angin hnatlang an nei nghal nia thudawn a ni bawk.