Aizawl: Dr. Pachuau Lalmalsawma State Nodal Officer & Official Spokesperson on COVID-19 chuan Multisystemic Inflammatory Syndrome in Children (MIS-C) ni theia lang Synod Hospital, Durtlang-a hmuh chungchangah a hnuaia tarlan ang hian hma an lak zui dan a sawifiah.

Synod Hospital, Durtlang-a Senior Consultant Paediatrics  Dr. John Malsawma hnen atanga MIS-C case a awm nia lang chungchang bawhzuiin ni 12.6.2021 chawhma lamah khan Dr. Pachuau Lalmalsawma leh Dr. R.Lalrintluanga, State Epidemiologist, IDSP te chuan Synod Hospital, Durtlang an tlawh nghal a. Khun khan taka he natna chungchang hi Dr. John Malsawma, Senior Consultant Paediatrics hnen atanga belhchian a nih hnuah MIS-C a ni theia a lan avangin Emergency Medical Relief (EMR), New Delhi in an lo zirchian turin Integrated Disease Surveillance Programme (IDSP) chuan nimin vek khan MIS-C Report Form hmangin an report an thawn nghal a ni.

MIS-C ni a lang hi mipa naupang kum ruk mi, Delhi atanga lo haw, June ni 4 a kawthalo leh khawsik vanga Synod Hospital, Durtlang a inentir, admit a nih hnua hmuhchhuah a ni a; tunah hian ziaawm lam panin hma a sawn chhoh zel thu dawn a  ni.

MIS-C hi natna chi khat, a bik takin naupang COVID-19 lo vei tawh te ah a  awm ve thin a. Taksa khawl hrang hrang - lung, chuap, thisen zam, kal, thluak, vun leh mit te he natna hian a khawih buai thei a ni. MIS-C hi COVID-19 vei, dam tawhte ah a langchhuak thei a, hetiang a lo thlen hian COVID-19 hrik chu an taksaah a la awm reng tihna erawh a ni kher lem lo.

Multisystemic Inflammatory Syndrome in- Children (MIS-C) hi COVID-19 vei, dam tawh te ah a awm thin avangin COVID-19 kai/vei lo tura invenna - mask vuah that,  kut silfai leh sanitize bakah midang bula awm lohte chu tu te pawhin kan tih makmawh a ni.

Indian Academy of Paediatrics Intensive Care Chapter in a tarlan danin Multisystemic Inflammatory Syndrome in Children (MIS-C) India ramah case 2000 chuang hmuhchhuah a lo ni tawh a ni.