Aizawl June 2, 2023 : Dy. Chief Minister Tawnluia hovin vawiin khan PHE Department ten Jal Jeevan Mission (JJM) hnuaia hnahthawh that avanga National Award chi hrang hrang lawmna hun an hmang a, he hun hi Dy. Chief Minister chuan a kaihruai a, PHE officer ten an hmalakna hrang hrang leh an lawmman lak te sawifiahna hun an hmang. PHE Minister aiawha JJM lawmman dawngtu Agriculture Minister C. Lalrinsanga chuan he hun hi a hmanpui bawk.

PHE Engineer-in-Chief Er. Liantluanga chuan Jal Jeevan Mission tan a nih hnuah thingtlang In 1,33,060-ah In 1,05,627-ah tui connection pek a nih tawh thu a sawi a, a hma JJM scheme tan a nih hma a mi nen In 1,14,828-ah connection pek a ni tawh tih a sawi, North East-ah a sang ber dinhmun hauh a nih thu a tarlang. Ti hian Mizoram thingtlang khua 728 awm mekah khaw 316-ah In tinin tui connection an nei vek tawh a ni.

E-in-C chuan kum 2023-2024 chhungin tui connection 22,485 pe turin Central sawrkarah target an insiam tih a sawi a, connection 4,318 pek a nih thu leh pek tur hmabak 18,167 an la neih thu a sawi. Thingtlang sikul 2,168 awmah sikul 2013-ah pek a nih tawh thu a sawi a, Aganwadi 11,583 awmah 1,526 pek a nih tawh thu a sawi bawk.

Aizawl Water Supply Scheme phase hnih te chuan nikhata tui litre maktaduai 34.8 thleng a pump theih tih a tarlang a, hetiang zat hi chu an pump tlin ngai loh tih E-in-C hian a sawi a, 132 Kv Sub-Station a neih hnuah tunhma zawng aiin tui an pump that thu a sawi bawk.

SIPMIU Programme Director Er. Lalrothanga Aizawl Water Supply Project (Augmentation of Water Supply & Construction of 37 MLD Water Treatment Plant), Setlak atanga Aizawl Hmar lam chawm tur tui lakna chungchang report a pe a, he tui lakna hian ni khatah tui litre maktaduai 37 pump chhuak thei tur a nih thu a sawi a, tui thlitfimna tur chu peihfel a nih tawh thu leh pipe phum tur hmabak tlem an la nei, a ti a, kar thum vel chhung chuan zawh hman an inrin thu a sawi.

Jal Jeevan Mission (JJM) 2023 (October, 2022 - March, 2023) inkarah hian Mamit District chuan fastest Moving Aspirational District Achiever Category-ah a dawng a, Aspirational Sistrict 117 zinga titha ber an ni a, Mamit District vek hian Achievers for Performance Among Aspirational District chu an dawng bawk.

Kolasib district-in District 740 zinga High Achievers Category-a pathumna a dawng a, District 740 zingah vek hian Siaha District chuan fastest Moving District Achievers category-ah pangnga lawman an dawng bawk a ni.

Heng lawmman thei tur hian tehna hrang hrang a awm a, hnathawh that vang te, Tui thianghlimna endik that vang te leh tui semchhuah dan felfai nei tura hmalak te chu a pawimawh te an ni.

Heng lawmman te bakah hian 2nd National Water Award 2019 -ah khan Leng Khua, Serchhip District chuan pakhatna an dawng a, hemi kum hian Ailawng, mamit District chuan pahnihna an la ve bawk.

3rd National Water Award 2020-ah khan Best Village Panchayat - North East Zone chu Sialsir, Serchhip District chuan 1st Prize a dawng a, Jal Survekshan Abhiyan 2022-ah khan Sairep VCP chu Water Warrior Award chu H.S. Lalawmpuiin hneh hlan a ni a, Swachh Bharat Mission Awards 2022-ah khan Mizoram chuan 2nd Prize a dawng a, hei hian lamawn Cheng Vaibelchhe khat a keng tel a ni.