Aizawl: Deputy Chief Minister Tawnluia chuan a bial chhunga AAY leh PHH chhungkaw 3,466 te June thla ration a khulsakna pawisa Rs. 2,72,475/- chu nimin khan Khawzawl DC hnenah Dy. CM aiawh ten an hlan a, nimin vek khan veng/khua hrang hranga Retailer-te hnenah hlan chhawn nghal a ni.

Deputy CM in a bial chhunga chhungkaw harsate ration a khulsakna pawisa hlanna pual DC Conference Hall, Khawzawl Darngawn-a neihah Bawrhsap Zothanmawia chuan Deputy CM in bial mipuite a ngaihven thu leh an tan a inhawn reng thu a sawi a. Covid-19 vangin Khawzawl District-ah lockdown kalpui mek a ni a, lockdown vangin eichawp zawng leh inhlawhfa thin tan eizawn a buaithlakin sum leng vak a tlem phah hle thu tarlangin, hun harsa tak kan tawh mek laia bialtu MLA in kawng hrang hranga tanpuina a rawn pe thin chu lawmawm a tih thu a sawi bawk.

Pawisa hlanna hun hi Lalrohlua, Addl. DC Khawzawl chuan kaihruaiin Lalnunpuia, Chairman, Khawzawl District Village Council Association chuan Deputy CM in Covid-19 first wave lai atangin a bial mipuite tan theihtawp a chhuah thin thu leh, tunhnaia VLTF leh damdawiin a hman tur tanpuina a pek zawh hnu lawkah, chhungkaw harsa zawkte ration buhfai a khulsak leh ta chu lawmawm an tih thu sawiin, Khawzawl District tana theihtawp chhuaha thawktu DC leh a thawhpuite chungah lawmthu an sawi bawk a ni.

Deputy CM in June thla ration buhfai a khulsak zat hi AAY chhungkaw 676 tan quintal 236.6 leh PHH chhungkaw 2790 tan quintal 671.65 a ni.