Tun tum chu information technology lama India ram hmasawnna pawimawh tak mai leh keini mizoram sorkar hnuaia department hrang hrang te hnathawh dan kalphung thleng pawh tihchangtlunna tur, E-OFFICE hi National e-Governance Plan (NeGP) hnuaia Mission Mode Projects (MMP) zinga peng pakhat pawimawh zet mai a ni tih han hre phawt mai teh le. IT hmanrua nena Departments/ ministries hnathawhna hrang hrang tichangtlunna tura ruahman a ni. e- Office thil tum hi hlawm lian deuh deuh panga ah then a ni. 1. Category I-File related Services 2. Category II-Common Services 3. Category III-Productivity related Services 4. Category IV- Knowledge related Services 5. Category V- Technical Services E- Office project hi India ramah kum 2008 khan NEGP hnuaiah bul tan a ni daih tawh a, e –office project atan hian Rs. 1.81 Crores lai ruahman a ni a, pawisa pawh a tam tham hle mai. e-Office project buaitu ber National Informatics Centre (NIC) hnenah Kum 2009 khan pawisa hi pek a ni tawh bawk. E-Office architecture leh framework hi National Informatics Centre (NIC) ruahman a nia, he framework hnuaiah hian e-File, e-Records, Knowledge Management, Collaboration leh Messaging Services te awm vek a ni. Kan hriat theuh angin department hna kalphung hi a in ang lo khawp maia, a bikin bank te, account te, statistic te leh revenue lam te hian record vawn that tur an nei tam khawp a. Nitin mai hian record tam tham tak chin leh emaw, zawn chhuah a tul thin. E- Office ah chuan sorkar Office hnathawh dan hrang hrang te hi awmze nei thlapin electronics file system a thuam vek a nih mai bakah electronics file system hi department kalphung mil turin siamrem zel theih a ni bawk ang. Hei vang hian e –office chuan heng record hrang hrang te hi awlsam tak leh chak tak a zawnhmuh leh a tul apiang print chhuah emaw, thawnchhuah theih nan min pui nasa hle dawn a ni. Tin, Keini mizoram mai pawh nilo, khawvel hmun hrang hrang mite buaina ber pakhat, Office hrang hrang a file kalmuang thin lutuk te, file kawngbo te, file kal kual duah thin te, file changtu awm loh laia file awmna hmuh mai theih loh te leh file awmna chin hriat loh avanga rei tak zawn ngai thin te hi e- office kan hman theih chuan kan pumpelh thei dawn a ni. E- Office ah chuan awmze nei taka file kalpui a ni tawh anga, security technology changtlung tak siam a ni bawk anga, file te hi him tak leh anih dan taka kalpui anih theih nan security Audit pawh ruahman a ni bawk ang. Aw le, Office hnathawhna leh inbiakna reng reng hi file hmanga tih vek anih avang hian file tello chuan department hnathawk thei an awm lo a, engkim mai hi file hian a keng vek mai si a, heivang hian e-office ah pawh hian file kalphung siam that hi ngaih pawimawh ber a ni. e-office ah chuan heng kan file te hi electronics file system hmanga thuam a ni tawh ang a, file hrang hrang te hi computer systemah dah vek a ni ang. Tuna sorkar department hrang hranga file hman mek te hi e-files ah siamrem vek a ni anga, eng hunah pawh file awmna chin hriat zung zung theih nan file tracking system pawh siam a ni bawk ang. Aw le, Office environment lamah han pakai ta ila, Office tam tak ah chuan Modern Office management atana tangkai tak tak computer, printer, photo-copier, fax, Network leh internet kan nei fer fur tawh nachungin kan hman dan han ngaihtuah hian tangkai zawka hman dan a la tam khawp mai tih kan hre vek awm e. Paper tam tham tak nitin kan hman ral ti tlem turin e-office ah chuan Less paper office ruahman a ni ang. Tin, electronics khawl hrang hrang hmanga Office hnathawhna bungrua changtlung tak neih a ni bawk ang. E -Office hi kan hmang dawn a nih chuan Office hnathawk, a tak taka nitin hmang tur te hian IT lamah tun aia nasa a hma kan sawn a ngai a, Training tha tak kan neih ngei ngei a ngai bawk dawn a ni. India ram hi IT lamah kan hmasawnna a chak hle mai, tun hma lama ram changkang ho chauh tih theih a kan ngaih te kha tunah chuan kan ram ngeiah a takin kan hmu ve ta. Tunah hian e- office pawh hi India state hrang hrangah hlawhtling taka enchhin a ni mek a, chung zinga langsar zual te chu Andra Paradesh Secretariat a SmartGov leh Gujarat secretariat a iWDMS te an ni. Kum 2010 October thla khan Kerela state NIC chuan department hrang hrangah e-Office a takin a hmang tan tawh bawk. Keini Mizoramah pawh hun reilo te chhungin kan la hmang ve ngei dawn a ni. - Er. Chhungpuia Renthlei