Aizawl: Myanmar tualchhung buaina avangin Mizoramah raltlan engemaw zat an awm a, an luh tamna ber nia hriat East Tuipui bialah chuan raltlan 1700 vel an khawsa mek.

ZALEN thudawn danin raltlan zinga 1473 chu khaw hrang hrangah an awm darh a, mi 245 erawhchu ramhnuaiah silpaulin zarah an inkhuar mek a, ramhnuaia inkhuar te hi an khaw lamah an feh thin niin an sawi. Raltlan zingah hian khawsak harsa deuh te awm bawk mahse a tlangpuiin an ngaihtuahawm lutuk lo niin an sawi a. Chhungkaw thenkhat chu an tu leh fa US leh hmun danga awm ten sum an rawn thawn thin a, raltlan thenkhat chu an inhlawh bawk niin ZALEN chuan thu a dawng. 

Raltlan hi Myanmar ramri dep khaw hrang hrangah an khawsa mek a, hnahthial district chhungah chuan raltlan hi mi 619 an awm mek nia thudawn a ni. Raltlan hi Lawngtlai district bakah Champhai district khaw thenkhatah an awm bawk niin an sawi.

Raltlan hi tunhnaiah chuan lut an awm meuh tawh lo a, tuna awmsa te pawh hi Chin Defence Force leh Myanmar sipai inkah vanga hlau tlanchhia leh CNA ten sipai beih an tum nia hriat vanga hlau tlanchhia te an ni. Raltlan te hi Covid an vei leh vei loh test zel tura tih a ni a, tunhnaiah Myanmar ah Covid-19 hri a darh nasat avangin tunhnaia lo lut zingah hri kai hmuh an awm niin an sawi.

Chin State Chief Minister thin Salai Lian Luai chu ni 15.6.2021 khan raltlanin Champhai-ah a lut niin an sawi a, tunah hian Aizawl ah enkawl mek nia hriat a ni. Salai Lian Luaia hi kum 2016 khan  Chief Minister dinhmun a luah tan a, sipaiin thuneihna an lak hlim khan a inah House arrest in an dah a ni.

Chin CM bakah MP /MLA mi 20 chuang chu Mizoramah an khawsa mek nia thudawn a ni.