Aizawl; Election Commission of India (ECI) in kum 2008 atanga kumin thlengin Mizoram ah Kohhran/ Kristian te hun pawi-mawh bawh thuahin inthlan (vote thlak/ chhiar) tum thum (3) a rawn ruat tawh.

Kum 2008 Mizoram Legislative Assembly inthlanah vote thlak ni tur a ruat November ni 30 chu Sabbath (Inrinni) a nih avangin Mizoram a kohhran te ngenn angin, ECI chuan December ni 2 (Thawhlehni) ah a lo sawn tawh.

Kum 2013 MLA inthlan hun December ni 4 (Synod inkhawmpui lai) leh vote chhiar hun a tan December ni 8 (Pathianni) ECI in a rawn ruat chu Presbyterian kohhran bakah kohhran hrang hrang, NGO te leh political party hrang hrangte chuan ECI ah sawn tur a ngenna 'Joint memorandum' an siam a, hmalakna hrang hrang an neih hnuah ECI chuan inthlan hun chu November 25 (Thawhtanni) ruatin, vote chhiar ni pawh December 6 (Zirtawpni) a rawn ruat.

Kum 2018, August 6 khan Mizoram a political party hrang hrang aiawhte chuan ECI aiawh lo zinte hnenah vote thlak ni atan leh vote chhiar ni atan Pathianni leh Inrinni hman loh an duh thu an lo thlen a, hemi ang hian Kristian te ni pawimawh bawh thuah in kum 2018 Mizoram Legislative Assembly inthlan hun ruat a ni lo.

Hetihlai hian tunhnai ah Serchhip bial by-election lo awm tur atan a inthlan ni April 17 (Inrinni), 2021 leh vote chhiar ni, May 2 (Pathianni) ECI in a rawn ruat chu Kristian te ni serh a nih avangin CM Zoramthanga'n ECI ah sawn turin a ngen mek a, kohhran hrang hrang, political party leh NGO thenkhat te pawhin an duhloh thu an sawi. He thu buatsaih lai nimin thleng khan bye election neih hun turah hian ECI lamin thu thar an la nei lo ni a hriat a ni.