Kan hriat angin India ram hi inthlang ram kan ni a, dan tlangpuiin kum 5 chhunga kan aiawha roreltu tur kan thlang thin. India rama roreltu turin MP kan thlang a, state a rorel turin MLA, Autonomous District Council a rorel turin MDC, khawpuia rorel turin Corporator, tual­chhunga rorel turin Local/Village Council te kan thlang thin a ni. Kan aiawha roreltu tur kan thlang thin hi democracy lungphum dik tak pawh a tih theih awm e.

Heng kan aiawha rorel tura kan thlan te hian engemaw harsatna tawh bik an nei a nih loh chuan kum 5 chhungin hna an thawk a, an term a ral ve leh an aiawh tur hi kan thlang leh thin a ni. Hetih lai hian Aizawl khawpuia rorel tura thlan thin Corporator inthlan erawh a hun takah tih theih a ni dawn lo a, hei hian mipuiah inhnialna a siam tam hle.

Aizawl Municipal Corporation (AMC) inthlan a hun taka neih theih a nih loh chhan hrang hrang hi State Election Commissioner chuan chanchinbumite hmaah a sawifiah tawh a, SEC in harsatna a sawi te hi an thlirna atang chuan awm tak tak vek an ni a. Chutih rual chuan SEC in harsatna a sawi te hi chinfel dan a awm tho niin a lang. Engpawhnise inthlan buatsaihtu lamin harsatna a awm an tih tlat chuan AMC chu a hun takah kan thlang dawn lo tihna a ni.

Hetia AMC inthlan sawn tlai anih chhanah hian SEC chuan sawrkar lam a inrawlh lo niin a sawi a. SEC thusawi hi a dik turah ngai ila, chutih rual­in inthlan buatsaih dawn reng reng chuan a buatsaihtute leh sawrkar erawh an inrawn tawn ngei a ngai thung a. Hetia inthlan sawn anih chhanah hian sawrkar lam hian sawn duh chhan an nei em ni aw tih mipui rilruah zawh­na a piang a, Aizawl khawpui kawng siam mek zawh hun leh sawhthing lei zawh lama in­thlan hi an tinzawn em ni tih pawh mipui atang chuan zawh­na a piang tam hle.

Engpawhnise tun tumah chuan a hun takah AMC inthlan hi a awm dawn lo tih a chiang tawh a, a hun taka AMC inthlan neih a ni lo zel erawh thil pawi tak a ni a. Hei hian tu sawrkar pawh nise tualchhung rorelna an ngaihthah zia a lantir chiang hle. AMC a ni emaw LMC pawh nise din ngei a ngaih vanga din, mahse hnathawk tak tak tura thuneihna leh sum pek erawh ngaihthah kan ang hle. Tun tumah chuan eng ang pawhin sawiseltu lamin sawisel mahse tih ngaihna a awm tawh lo ah ngai ila, mahse hun lokal zel turah erawh a hun taka in­thlan buatsaih ngei anih theihna turin hmalak ni ngei tawh teh se.