India ram hi inthlang ram kan ni a, dan tlangpuiin kum 5 chhunga kan aiawha roreltu tur kan thlang thin a ni. Rorelna in sang ber Parliament atanga tualchhung inrelbawlna thlenga aiawh thlang thin kan ni a, kan tihfuh chuan ram leh khawtlangin hma a sawn a, kan thlan fuh loh chuan kan tuar thin thung.

Mizoramah Municipality rorelna hmun hnih Aizawl Municipal Corporation (AMC) leh Lunglei Municipal Council (LMC) te kan nei mek a. Kan hma lawkah hian heng zingah pakhat zawk Aizawl Municipal Corporation-a kan aiawh tur Corporator mi 19 thlang turin kan in buatsaih mek a. Party hrang hrang te pawhin theihtawp an chhuah mek zel a ni.

AMC a ni emaw LMC pawh nise mipui ten kan hmelhriat dan hi a fuh chiah lo niin a lang a, mi tam tak ngaihdanah hi chuan harsatna siamtu leh sum khawntu ni in an hmu a, hei hi thil pawi tak a ni. Municipal hi India danpuiin rorelna inkhaidiat a dinhmun pawimawh tak, mipuite phurrit chhawktu leh hmasawnna hna thawktu atana a ruat a ni. Hetia thuneihna in khaidiat tha tak mai a awm hi a lawmawm a, chuvangin harsatna siamtu ni lovin kan harsatna min chhawktu atana kan hman hi a pawimawh hle.

Kan hma lawkah pawh kan hriat angin Aizawl Municipal Corporation inthlan kan hmachhawn leh dawn a ni a, chuvangin Aizawl mipuite pawhin thluak fim tak hmangin tu hi nge mipui tana thawk tha ber tur tih ngaihtuah chunga vote thlak a pawimawh hle. Kan thlan fuh chuan Aizawl khawpui hian hma a sawn dawn a, kan thlan sual erawh chuan a tuartu tur chu mipuite bawk kan ni. Political party hrang hrang leh candidate te an rawn inzuar mek a, heng zingah hian tunge kan aiawha tha ber tur uluk taka lo chian a pawimawh hle. Mipuite pawhin party ruihchilh kan bansan mek niin a lang a, a lawmawm hle.

Tu pawh AMC-ah hian lo sawrkar se mipui dah pawimawhin Aizawl hmasawnna tura theihtawp an chhuah a pawimawh. Aizawl khawpui hi kan hriat angin ruahmanna fel awm lova thang a ni a, kan insak dan a ni emaw tuihawk luankawr leh kawng kaldan pawh a mumal lo hle a. Tlang rama awm kan nih vangin kumtin khuarel chhiatna avangin harsatna kan tawk thin a. Heng kan harsatna hrang hrang tha zawka chingfel theitu tur thlang chhuak thim ila a tha hle. Sawrkar lam pawh hian AMC hi hnathawk thei tura a thuam chak leh zual a pawimawh. Tute pawh AMC ah hian lo sawrkar se Aizawl hmasawnna atan huai takin ke pen thei se a duhawm hle.