Aizawl Municipal Corporation inthlan kaihhnawih chu tluang taka zawh a ni ta a, state a rorel lai Zoram Peoples Movement ten hneh takin sawrkarna an siam dawn ta a. Party dangte pawhin an chak lohna hi pawmin tha taka rorel turin ZPM te hi duhsakna an hlan a ni.

Kan hriat angin Aizawl Municipal Council/ Aizawl Municipal Corporation (AMC) hi tum li kan thlang ta a, AMC term hmasa ber kum 2010 kha chu a mumal lo hle a. AMC lampum te kha Aizawl Musical Chair ti ten fiamthu thawh nan hman hial a ni a, sawrkarna chelhtu an inthlak sek mai anih kha. Mahse a hnu lam kum 2015 leh 2021-ah erawh MNF in sawrkarna siamin tluang takin a kal a, tunah ZPM ten sawrkarna siam ve lehin ward 19 awm zinga 17 hial an la thei a, sawrkar ngialnghet tak an din ngei a rinawm.

AMC ward 19 zinga 17 hial an la thei hi a mak ti tan chuan mak a tih theih ang a, a awm hle mai ti tan chuan a mak lem lo thei awm e. Hemi awmzia chu ZPM te hi Aizawl mipui hian khawpui enkawl­tu atan an ring hle tih chiang takin a lantir a ni. Mipui ten an rin ang ngei hian AMC sawrkar thar hian hna thawk ngei se a duhawm hle.

AMC a ZPM hneh taka an tlin chhan hrang hrang a awm thei ang a, chung zingah chuan an hmachhawp an sawi (manifesto) vang te, kum 10 AMC a sawrkarna lo chelh tawh MNF sawrkar nin vang te, ZPM ten candidate an neih that vang te a ni thei ang. Municipal sawrkar hi mipui phurrit siamtu tur ni lovin khawpui hmasawnna hna thawktu tur a ni a, Aizawl mipui tam berin AMC kan hmuh dan hi hmasawnna lam ai mahin mipui harsatna leh phurrit siamtu niin an hria a ni. Entirnan mahni ram chhung ngeiah in sa duh pawh ni ila, paltlang ngai neuh neuh a tam hle a. Chumai ni lovin in sak phalna (building permission) buaipui chhung a rei em em mai bawk a, hemi chungchang ringawtah pawh hian mipui an lungawi lo hle niin a hriat.

Aizawl mipui ten ZPM sawrkar an dintir chhanah hian an manifesto hian thui takin kawng ro a su a. Mipui tan awlsam zawka dawr theih leh ban phaka AMC hnuh hniam an tum thu an sawi te, langtlang taka sum an hmuh leh hmanna ruahman an tum thu an sawi te, vawk vulh khapna dan ennawn an tum thu an sawi te, in sak leh lei laih ennawn an tum thu leh thildangte hian mipui ngaihzawn a hlawh hle tih a lantir bawk. Engpawhnise AMC ah sawrkar chak leh ngialnghet tak a ding dawn a, an thiltum mipuia an puan te hi an tih hlawhtlin leh hlawhtlin loh mipuiin an teh ve thung dawn ta a ni.