Assam Rifles te hi Aizawl khawpuiah hian kum 100 emaw zet chu an awm tawh a. Tuna an awmna hmun hrang hrang hi an awm tirh chuan hmun tha leh laili an ni lem lo a, mahse khawpui thang zelah hmun tha leh laili laia sipai inbun reng mai hi hnawksak tihna a lo awm a. Hei mai bakah Assam Rifles leh khawtual mite inkara inhmuh thiamlohna thleng leh nunna chan hial an awm hnu phei kha chuan ngaimawhna a lian zual hle. 

Aizawl khawpui laili atanga Assam Rifles te an chhuah dawn takah chuan an chhuahsan ram hi engtia hman tangkai tur nge ni ang tiin ngaihdan hrang hrang a piang hnem hle a, thuneitute tan pawh rawtna tha tak tak lut hian lu a tihai hle in a rinawm. AR chhuahsan ramah hian engemaw chen development hna kalpui a tul ngei dawn a, chutih rual erawh chuan committee in hmun hring (green area) atan 60.67% siam a tum erawh thil lawmawm tak a ni.

July ni 24, 2025-a Assam Rifle ram chhuahsan hman zui dan tur ngaihtuahtu chief minister hova advisory committee thukhawm chuan AR ram hman tangkai dan tur chungchanga rawtna lut hrang hrangte an sawiho a, heng zinga sawizui hlawh ta ber chu Assam Rifles Kohhran biak in chungchang a ni. He thil hi politics a inbeihna atan hman zui a niin eptu party MNF phei chu committee atanga an inhnuhdawhna chhan pawh a tih theih hial awm e. Hetia inbeihna anih chhoh tak mek avang hian sawrkar pawhin thil awmdan an sawifiah a ngai ta hial.

Thil reng reng hi kan ngaihtuah leh thlir dan a zirin kan thutlukna a inang lo hle thin. Sawrkar lam chuan AR Kohhran ram hi sawrkar leh AR te ram inhlanna MoU-ah a tel vangin kohhran chu hlan turin a ngen a, aiawh insiamin kohhran hruaitute an dawr a, mahse Mizoram Presbyterian Church chuan rem an tih loh thu an sawi. Sawrkar hian tuna Mandir awm mek hi awm lo se a duh niin a lang a, hetia biak in a awm bik chuan tan fungah an nei thei dawn a ni. Sawrkar thlirna atang chuan thil awm tak a ni a, engpawh nise thutlukna siam a la nih loh vangin engtin nge kalpui zel anih dawn tih chu hunin a la hril turah ngai ang.

Hetia politics inbeihnaa a chan chhan hi engemaw laia rorellai ZPM in AR ten Aizawl an chhuahsan huna kohhran ram hi office atan an hual nia sawi a awm vang kha niin a ngaih theih a, chutih rual erawh chuan ZPM lam chuan chutianga hmalakna engmah a awm lo niin an sawi ve thung. AR biak in chungchanga sawrkar thlirna hi thlirna awm tak a ni a, chutih rual chuan kum 1950 vel atanga ding tan tawh nia sawi biak in leh Hari Mandir tehkhin chu a chi loh hmel. Biak in hmun hi Synod kutah hlan tawh nia sawi awm pawh hi a dik chuan va chhuh luih leh talh tum pawh a fel lo hle. Engpawhnise chief minister kaihhruai advisory committee in thutawp an la siam dawn a, kohhran mipuite rilru ti na lo thei ang berin thutlukna siam hram se a duhawm hle.