Tunlai Mizoram politics-a thu lar leh khel hlawh ber chu Indian Air Force-in Lengpui-a ram an lei chungchang hi a ni awm e. He thilah hian inpuhmawhna a nasain rorel lai ZPM leh eptu MNF te chu an inbei nasa zual a, a lehlam thu han hriat hi chuan an thiam ve ve lawi bawk si.

Indian Air Force ram lei chungchang hi Mizoram rorelna in sang Assembly session-ah pawh sawi chhuah a niin India president, prime minister leh home minister hnenah pawh thlen a ni tawh a. A tul angin Mizoram MP pahnihte pawhin India ram rorelna in sang parliament-ah sawi chhuah an la tum cheu bawk. Hei hian mipui ngaihven a hlawh zia a lantir chiang hle.

Engpawh nise Lengpui ram lei chungchangah hian dan pangngai lo deuha thil kalpui chu a awm niin a lang a, hmanhmawh taka thil tih fel nia sawi awmte hian mipuiah zawhna a siamin rinhlelhna a siam bawk. Engpawh nise chhui chian a nih loh chuan a sawi thiam thiam thusawi hi kan awih mai zel dawn tihna a ni a; chuvangin, chhui ngei a pawimawh.

Lengpui ram lei/hralh chungchangah hian man tang ei an awm nia inpuhna pawh a ri nasa hle a, hetianga man tang ei an awm leh awm loh pawh hi chhui vek theih a ni dawn a. He ram inleinaa a mawhphurtu ber leh meizanghlaptu ber pawh chiang taka hriat a ni a, chuvangin hetiang sum lo dawng te chu an account chetvel dan atangin chiang takin a hriat dawn a ni. Tun dinhmunah chuan thiam thu sawi emaw sawrkar hmasa leh tuna sawrkar mekte tih dik loh sawi sawi hian awmzia a nei tawh lo a, a dik lo lai chiang taka pho lan tum hun a ni tawh zawk.

Lengpui ram lei/hralh chungchangah party pahnih chuan chhui anih theih nan thuneitu sang an ngen tawh a, rorel lai party pawhin chhui an duh thu an sawi bawk a. Hei mai bakah chief minister-in assembly house-ah meuh he thil hi CBI (Central Bereau of Investigation) chhuitir an nih dawn thu a sawi bawk a, a lawmawm tak zet a ni. Lengpui ram hralh chungchang hi tunah chuan politics ball-ah a chang tawh a, tute emaw control theih loh leh Mizorama chhung leh khat, laina hnai nei loten an chhui ngei hi a ngai tak zet e.