Tun hnaiah Chief Minister in Mizoram Law College zirlaite hmaa thu a sawinaah Mizoram inremna chungchang leh kan inhumhimna ILP chungchang a sawi chuan khel zui a hlawh hle a. MNF party chuan a thusawi vangin Chief Minister chu August ni 15,2026 hma ngeia ngaihdam dil tura an phut thu leh hei hi a ti lo anih chuan a tul anga hmalak an tum tih an sawi a. Congress party thalaite pawhin Chief Minister chu dawih taka thilti-ah puhin pawnfen fentirna thlalak an pho chhuak hial a ni.

Chief Minister thusawi chungchangah hian kan dawnsawn dan a zirin kan sawichhawn leh dan pawh a inang lo dawn hle mai a, inhnial theih tak thil a awmin ruling lam tan chuan huat tur a awm lem lo a tih theih ang a. Hetih lai hian haw duh leh ngaihdan dang neia thlirdan danga thlir tan chuan huatthlala tak a ni thei bawk. Mizoram inremna chungchang a ni emaw ILP chungchang a sawinaah hian Chief Minister hian eng rilru pu in nge a sawi hriatthiam a har a, chutih lai erawh chuan hetiang inhnialna awm thei lakah hi chuan tawng fimkhur a tha hle.

Kan hriat angin Mizoram chu kum 20 chhung rambuai a ni a, kum 1986 a remna a awm khan mipuite an hlim hle anih kha. Inremna hi duhthusam ni lo mahse mipui ten an tawrh nasat tawh em avangin hetia inremna a awm thei hi a lawmawm leh zual a. Chutih mek laia hun kal tawh thilthleng sawi chhuak a, tute emaw rilru tina thei zawnga tawngkam hman hi chu a fuh lo a. Hei mai bakah ILP chungchangah pawh CM thusawi hi thil dik tak ni mahse sawi kher loh atan thil pawi lemlo tak a ni. ILP hi hnamdang tan chuan a hnawk em em a, tih­tawp hi an duh ngawih ngawih ang tih a hriat a, chutih lai a kan ram hruaitu berin hetiang tawngkam an hmang lai tak hi a fuh lo a. Hei mai bakah political platform ni lo, zirlaite hmaa sawi a ni hi a fuh lo zual niin a lang. Engpawhnise ILP chungchangah hi chuan inralrinna dar kan lo vuak lawk erawh a pawimawh hle thung.

Engpawhnise hun kal tawha kan politician te leh tuna ram hruaitu ni mek te hmingchhiat thinna leh anmahni vaw let thin tu chu an tawngkam hi a ni fo thin. Thil dik zawng zawng hi sawi a tha kher lo a, thahnem ngaih luat leh mahni dinhmun thatna tura tute emaw va sawichhiat kher pawh tih loh a tha. Tun tuma inhnialna thleng mek Chief Minister thusawi a ni emaw hun kal tawh leh kan hma hun zel atan pawh kan politician te hi an tawng fimkhur leh zual a pawimawh hle.