Tun hnaiah Mualthuam North-ah tual thihna a thleng a, Police ten ngawrh taka chhuiin pawikhawihtu ni ngeia hriat mi pahnih an man a. Police ten hnu an chhuina kawngah khawtlang leh mipui ten an thlawp tha hle a, dan bawhchhiatna leh mahni thua dan lo lek kawh te mai pawh a awm lo niin a lang a. A lawmawm tak zet a ni.

Mualthuam North a tualthihna chungchangah hian thu lengvak a tam hle a, chutih lai chuan media hrang hrang ten mipui hruaisual thei lam hawi thu leh hla an nei lo niin a lang a. Thil thleng thenkhatah hi chuan a ngaihnawm leh mipui hip zawnga thil han phuahkhawm mai te hi a awm thin a, tun tumah erawh khatiang thil zeldin ang chi kha a awm lo hle. Hei hian Police te hmalakna kan rin ngam zia leh mipui pawh kan thanharh tawh zia a lantir awm e.

Tualthihna a ni emaw pawngsual leh sualna dang a lo thlenin dan leh thupek kengkawhtu ni lo, mahnia thuneihna inpe chawp leh duh dan ang anga thil lo ti an awm fo thin. Hun kal tawhah pawh tualthahna a ni emaw sualna thlengah Police te kuta dah mai lo leh mahnia thil lo tih vanga pawikhawihtu man loh a awm fo tawh thin. Pawikhawihtu man chhuahna tura finfiahna awm te tih chhiat anih vangin misual man loha an awm thin hi a pawi a, hemi kawngah hian mipuite kan thanharh zel a pawimawh hle.

Tun hnaia Mualthuam North a thilthleng chung­changah pawh mipui ten dan leh thupek kengkawhtute an thawhpui tha hle a, hei hi thil lawmawm tak a ni. Pawikhawihtu man chhuah kawngah Police te an thawkrim a, an thawhrimnain rah tha a chhuah a. YMA leh khawtlang mipui ten Police hi pui lo se chuan harsatna pawh awm thei a ni, hetia tanrualna avanga man chhuah a ni hi a lawmawmin tun hnu zelah pawh chhunzawm zel nise a duhawm hle.

Pawikhawihna a thlenin hmun thenkhatah chuan mipui ten mahni thua ro lo rel ve mai te a awm thin a, hetiang mipui sa hulh hulh rorel (mob rule) ang hi chu kan kalpel a hun ta hle. He­tianga mipui kalkhawm thiltih anih hi chuan thluak a fim lo a, a tawng ring ring thusawi te kha kan awih mai chang a awm thin. Hetianga thil kan tih hian pawi­khawihtu in an chunga dan rorelna tur an hmuh loh phah a, chumai bakah a tuar lo turin an tawrh phah fo thin. Hei mai bakah pawikhawihtu chhung leh khat chunga engemaw lo tih awm thin pawh hi pumpelh zel a tha hle. Kan hma hun zelah pawh pawi­khawihna a lo thleng anih pawhin mahni thua rorelna lo lek ve mai hi kan tih loh tawp tur a ni a, hma kan lo la ve anih pawhin dan zawm zel chunga tih ni zel se a duhawm hle.