Election Commission of India ruahmanna in electoral roll ennawn thawh thumna special intensive revision of electoral rolls 2026 atan hmalak chhoh mek a ni a, special intensive revision in a tum ber chu India khua leh tui dik tak vote nei thei te thun luh vek leh khua leh tui ni lo te roll atanga paih a ni. 

India ram state engemaw zatah special intensive revision hi neih tawh a niin Election Commission of India chuan Mizoram leh state 16 ah a thawh thumna atan special intensive revision hi kalpui leh turin ruahmanna a siam a ni. State tam taka kalpui tawhnaah hmun thenkhatah chuan sawiselna a awm a, a bikin eptu ten an sawisel nasa zual emaw ni a tih theih. Mizoram erawh kan danglam a, sawisel kai lo tura tun atanga sawrkar leh mipuite kan lo inbuatsaih a pawimawh hle.

Electoral roll ennawn hna hi a khat tawkin thawh fo thin a ni a, mahse hetianga a nawlpuia thawh ang chi hi chu a hautak avangin ECI pawhin a ti zen zen lo a ni. Chutih rual chuan electoral roll dik leh fel fai a awm theih nan a khat tawkin a buatsaih thin a. Tun tum Mizorama electoral roll enthat turah pawh hian kum 2005 electoral roll kha innghahna atan hman a ni dawn a, chumi awmzia chu hemi kuma e/roll a chuang leh an thlah kal zel kum 18 tling chin chu roll-ah thun an ni dawn a. Kum 2005 electoral roll a chuang lo te chuan document thil tel ngai hmangin roll-a a luh hi an dil leh thei dawn a ni. 

Mi thenkhat chuan voters ID, Aadhaar card leh tuna chhiarpui neih mek hi kan hriatpawlh emaw ni chu aw tih mai a awl a. Chhiarpui-ah hian India rama awm zawng zawng chhiar an ni dawn a, tuna raltlan kan kawl mek Myanmar lam mi an ni emaw, Manipur leh Bangladesh mi pawh nise chhiar vek an ni dawn a ni. Aadhaar pawh hi India rama cheng tan chuan neih theih a ni a, chutih rual chuan voters ID erawh India khua leh tui chhinchhiahna anih avangin mi na zawng tan neih theih a ni lo. Voters ID neite chauhin kan aiawha roreltu tur an thlang thei a ni.

Special Intensive Revision of Electoral Rolls 2026 neih tur hi a pawimawh tak zet a, chuvangin a buaipuitu sawrkar hnathawkte pawhin fimkhur leh uluk taka an kalpui a tul hle. Mi tam tak vote neih tum, mahse India khua leh tui dik tak ni si lo an awm ngeiin a rinawm, chung mite chu dan hmanga huaisen taka lo hnawl ngam a tul. Hemi kawngah hian political party leh tlawmngai pawlte an pawimawh hle. Mipuite pawhin mawhphurhna sang tak kan nei a, roll buaipui lai hian ngaihven ila. India khua leh tui dik tak chu roll-ah hian inthun ngei ila, chutih rualin dan dik lo hmanga inthun tum an awm anih erawh chuan thun luh an nih loh nan thuneitute thawhpui zel ila a lawmawm hle ang.