Foreign Contribution (Regulation) Act a lam tawia FCRA kan tih mai hian tunlai hian sawi a hlawh hle mai a, sawi a hlawh chhan hi Parliament-ah pass mai tum anih avang leh hnam tlem leh sakhaw tlem zawk betute tan a hlauhawm thei nia ngaih anih vang a ni ber.

FCRA hi India ram pawn atanga tanpuina sum leh pai emaw thilpek rawn lutte khuahkhirhna leh enkawlna dan a ni a. Tualchhung NGO, tlawmngai pawl, sakhaw pawl leh mimal ten ram pawn atanga tanpuina an dawn reng reng hi India ram tan a him em? Eng atana hman tur nge tih te, khawi atanga lo kal nge anih tih bakah hmansual theih anih avangin sawrkar laipui chuan khuahkhirh tul a ti a, chumi avang chuan kum 1976 khan he dan hi siam a ni a. Tum engemaw zat he dan hi siamthat tawh a niin Parliament session-ah siamthat leh tura chhawpchhuah anih avangin ngaihven a hlawh thar a. Party politics-ah a chang chho ta a ni ber e.

Thil reng reng hi kan thlir dan leh hman dan a zirin a tha lam leh a chhe lam hi a awm vek a, Foreign Contribution (Regulation) Act pawh hi a tangkaina zawnga sawi dawn chuan zirna leh hriselna chawikanna atan hman a niin mi tam takin an chhawr tangkai a. FCRA chungchanga harsatna avangin kohhran enkawl College pakhat chu a tawp phah hial a ni. Hetih lai hian a tha lo leh hlauhawm zawnga sawi duh tan chuan sawichhiatna tur pawh a awm ve tho a, sakhaw dang betute chuan FCRA sum hi Kristian te chuan sakhaw dang­te Kristian sakhuaa inlehtirna atan an hmang niin an sawi ve thung.

Engpawhnise, sawrkar laipuia sawrkar mekte hian hnam tlem leh sakhaw tlem zawk betute hi a ngaihsakin an hamthatna tur a ngaihtuahpui lo em aw tih mai a awl hle a. Keini hnam tlem zawkte kan inhumhimna tur Forest Conservation Amendment Act te pawh hman tir kan ni tain hei hian kan inhumhimna tur leh kan ram kan humhalh ve na tur tam tak a ti bo a. Chutiang zelin Kristian te tan chuan India lairil lama rawngbawl pawh a harsa ta hle a, sakhaw zalenna ram tia kan sawi thin pawh tunah chuan sakhaw zuitu tlem zawk tan chuan pawm a har ta lek lek mai.

FCRA hi India rama Kristian sakhaw hruaitute chuan pass lo tura an duh thu Union Home Minister hnenah pawh an thlen tawh a, hnam tlem zawkte pawhin harsatna a siam thei nia hriain pass lo tura an duh thu an sawi tawh bawk. Mizoram lamah erawh chuan party pakhatin an duh loh thu sawiin midang erawh an la ngawi thung a. FCRA chungchangah hian kohhran hrang hrang leh sawrkar hian inthuruala pass lo tura hma kan lak ve hi kan tih awm tak niin a lang e.