Tun hnaiah Mizoram Larsap chuan Sairanga FCI Godown sak hna chawlh lailawk mek chungchanga harsatna awmte chinfel theih dan tur Land Revenue & Settlement, Environment, Forests & Climate Change leh Food Corporation of India hotute a sawipui a. Larsap Pu Indra Sena Reddy Nallu chuan hmasawnna ruhrel pawimawh siam a nih hmain nakin lawka harsatna a awm loh nana fimkhur tlan a tul thu sawiin, hemi kawngah hian a kaihhnawih department hrang hrangte inkarah thawhhona tha a awm a pawimawh thu a sawi a ni.

Sairanga FCI Godown sak hna hi kum 2021 vel khan FCS&CA Deparment ram Hectare 3.1 vela zau hawhtir a ni a. FCI Godown sakna hmun hi Riverine Reserved Forest a ni tiin Forest department chuan chawlhsan hrih turin an ti a, chuvangin chawlhsan a ni ta a ni. Hetiang deuh bawk hian Mizorama hmasawnna hnathawh tur tam tak chu Forest department remtihna leh phalna hmuh a nih thin loh avangin thawh theih lohte a awm thin a. Mizoram chak lakna ber Silchar kawng kan tih mai pawh zau zawka laih tum mek leh thawh mek a nih laiin Forest lamah harsatna a awm avangin thawh chhunzawm hleih theih a ni lo a ni. Chutiang zelin Mizorama tuikhuah tur leh thil dang dangah pawh forest clearance a buaithlak avangin thawh hleih theih lohte pawh an awm tawh a ni.

Mizoram hi kan hriat angin kum 20 zet rambuai kan ni a, khatih hun chhung zawng khan hmasawnna hna thawh hleih theih a ni lova. State dang ten kum 20 chhung hma min sawn khalh tihna a ni a, state dangte han elpha tur hi chuan kan tan hle a ngai tihna a ni. Kawngpui laih a ni emaw, electric siamchhuahna atana tuikhuah a ni emaw thildang hmasawnna hnathawh tur engemaw avanga an khaihlak thin hi a pawi tak zet zet a ni.

Hmasawnna hnathawh kawngah Forest department hian harsatna an siam nia ngaiin thenkhat phei chuan an dem hle a, an thlirna atang chuan a awm viau ang. Chutih rualin Forest department ten vawiin thlenga ramngaw, thing leh mau mai bakah ramsa an la humhalh ve tang tang vanga hetiang hun hi thleng kan la ni a. India rama ramngaw nei tha pawl nia min la sawi chhan pawh hi an thawhrah a ni. Khawvel sik leh sa danglam chak lutuk venna atana department hmalaknate hi a fakawm a ni.

Kan rama hmasawnna hnathawh kawngah harsatna a awm fo mai hi chinfel dan awm se a duhawm hle a. Tuna FCI godown a ni emaw hmun danga hmasawnna hnathawh kawngah pawh harsatna a awm hian a tuartu ber chu mipuite an ni zel a ni. Chuvangin eng hna pawh thawk dawn ila fimkhur, ngun leh uluk taka ruahmanna siam theih zel ni tawh se a duhawm hle.