Khuarel chhiatna chi hrang hrang lirnghing, tuilian, kangmei, leimin leh thlipui zingah Mizoramin kan tawrh nasat ber chu leimin hi a ni awm e. Mithiamte chuan Mizoram hi lirnghing nasat theihna hmunah a awm niin an sawi a, mahse chuti chung chuan vawiin thlengin Pathian hruaina avangin lirnghing nasa kan la tawng lo a. Chhiatna lian thlen thei thil dang kangmei, tuilian leh thlipui pawh hi hmun dang ngaihtuah chuan kan la tuar nep hle.

Mizoram hi tlangram a ni a, hei vang hian chhiatna thleng zingah leimin hi kan buaipui ber a ni a. Nikum maiah pawh cyclone Remal vanga leimin a tam zia leh nunna hlu tak mai kan chan nasat zia han hriat te khan kan fimkhur a tul hle. Kuminah pawh fur tak tak la intan chiah lo mahse ruah sur kaihhnawiha lung tla vangin Aizawl khawpui velah mai pawh mi 4 in nunna hlu tak an chan der ta mai a. April ni 10,2025 tlai khan ruah sur leh khawpui ri vang nia ngaih theihin Ngaizel kham koa lung a tla a, hetih laia he kawnga tlan lirthei delhin mi 1 chuan nunna a chan anih kha. Tun hnai mai April ni 28,2025 pawh khan ruah sur vang nia ngaih theih bawkin Lengpui kawngah chhiatna a thleng a, kawng chhak lama lung tla chuan a hnuaia lirthei kal delhin mi 3 an thih bakah hliam na tak 1 a awm bawk a ni.

Kan hriat angin tlang rama awm kan ni a, kawng kan siam dawn a ni emaw in pawh sa dawn ila hmun rem sa a van em avangin leilung awmsa kan ti danglam lo thei lo a. Kan ram leilung nghet tawk lo kha kan ti nghet lo leh zual a tih theih awm e. Hei vang tak hian fimkhur leh zual a ngai a, hmasawnna kan neih tum luatah 'Mangkhawng' kan in siam zel ang tih a hlauhawm a. Chuvangin in hmun kan lai dawn a ni emaw in kan sa dawn anih pawhin mithiamte rawn chung zelin hma la thei ila chhiatna thleng tur lakah kan fihlim thei ang. Kan in leh lo din dan hi kawng lehlam zawnga ngaihtuah phei chuan chhiatna a thleng tam lo hi kan vannei tak zet a tih theih hial awm e.

A bikin Aizawl khawpui hi eizawnna leh thil dang vangin kan pan khawm lo thei lo a, a rem ang angin in leh lo kan din bawk a. Heng kan in leh lo te hi eng ang chiaha hlauhawm leh him lo nge a ni tih enfiah fo theih nise a duhawm hle. Hei bakah hian hmun engemaw zatah min hlauhawm tak tak a awm niin a lang a, heng hmun hlauhawm nia lang te hi thuneitute hian fur lo thlen tak tak hma hian enfiah thei se, a tul angin hmalak nghal nise a duhawm hle.