Labour, Employment, Skill Development & Entreprenuership Department (LESDE) leh Ministry of Skill Development & Entreprenuership, (MSDE) Government of India te tangkawp te chuan Nilaini atang khan Innovation Competition & Exhibition Fair - PUM 2023 chu an buatsaih a, he huna hian mi hrang hrangin an thiam thil an pho chhuak a, an thil siam chhuah te hlawkpui thei turin sawrkar hian hmalakpui thei se a duhawm ngawt mai.

He intihsiakna hmachhawn tu ten an thil phochhuah te atanga hlawkna an neih theihna tur leh tam zawka an siamchhuah theih dan tur ngaihtuahpui hi a buatsaihtute lam mawh pawh niin a lang. PUM kharna hun hmanpuitu Chief Minister chuan PUM zarah hian Industry lian zawk an lo la chhuak ngei dawn a, ngaihtuahna thar nei chunga hna thawk zel turin intihsiakna-a tel te chu a chah.  Chutihrualin heng intihsiaknaa tel te hian engtiangin nge hma an lak ang tih hi ngaihtuah ngai chu a ni.

Khawl pakhat pawh harsa taka khawrpum hram hram te tan hian hlawk khawpa khawl tam tham tak siam chhuah emaw, an khawl hmang thil tam zawk siamchhuak tur chuan an khawl te pawh hi a tha tawk dawn lo tih a chiang a, hemi kawngah hian sawrkar hian an dinhmun te thlir chunga hma an lakpui hi an tih tur ni ngei pawhin a lang.

Engineering category huanga Blackwire siamna khawl . siamtute, Wireless Water Pump Controller siam te, Waste Oil thuk siamtu te ang te hi an khawl hian hna pawh thawk thei ta reng pawh ni se, thirzai siamna atana raw material kha an tan neih a harsa dawn. Water pump controller siam pawh hian tam zawk siam turin sum leh pai tam zawk a mamawh ngei dawn tih a chiang a, Oil hlui hmanna thuk siamtu tan pawh hian hlawk zawka thuk tam zawk siam tur chuan mamawh a ngah ve khawp ang.

Non- Engineering Category lawmman la zinga mi,  Bamboo Tea siamtu tan pawh hian hlawk tura tam tham siam tur chuan mamawh a ngah dawn tih a chiang a, Eco Board siamtu tan phei hi chuan cottage industry satliah mai pawh tawkin a rinawm loh. 

Chief Minister-in ngaihtuahna thar nei chunga thawk zel tura a chah rual hian ngaihtuahna senga thil an lo siamchhuah tawh te hmang hian hmalakpui theih ni se a duhawm hle a, chu chuan Industry lian zawk pawh a hringchhuak zawk ngei a rinawm a ni.