Kan hriat angin Mizoram sawrkar chuan mipuite hamthatna nia hriain Mizoram Universal Health Care Scheme (MUHCS) a kalpui mek a. Tun dinhmunah Mizoram chhunga damdawi in 18 leh day care centre 5 ah te hman theih a ni tawh a, mahse heti chung hian mimal enkawl damdawi in lian engemaw zatin an la zawm lo thung a. Health Minister chuan tun hnaia a thusawi naah MUHCS 2.0 ah rate thar siam anih thu leh hemi hmang hian tuna la zawm ve lote chuan an zawm ngei a beisei thu a sawi a, Health Minister thusawi hi hlawhtling ngei thei se a duhawm hle.

Mizoram Universal Health Care Scheme hi thil tha tak a niin damlo rethei zawk ten an chhawr tangkai hle a, chutih rual chuan private damdawi in thenkhatah hman theih a ni tlat lo lai hi a buaina lai ber chu a ni. Zep nak emaw tuna MUHCS hman theihna damdawi in hian min dawl zo thlawt lo a, sawrkar damdawi in a ni emaw MUHCS hman theihna mimal leh pawl enkawl damdawi inah hian lut duh mah ila khum a awm miau loh chuan tihngaihna a awm ngang thin lo a ni. Kan damloh chuan damdawi in a pan a ngai a, MUHCS hman theihnaah luh duh mahse a rem loh chuan loh theih lohin private damdawi in a pan ngei ngei a ngai thin. Chutiang zelin MUHCS hman theihna damdawi in pawh ni se hmanrua leh mithiam an awm loh chuan chutiang awmna damdawi in chu loh theih lohin a pan a ngai thin bawk. MUHCS hnuaia inziak lut tan pawh 'ka right a ni' tiin han phut viau mahse kha damdawi inah khan awmna tur khum a chan miau loh chuan tihngaihna a awm lo bawk.

Tun dinhmuna a mu tan lai ber chu private damdawi in lian kan neih te hian an zawm ve ngei ngei a ngai tih hi a ni. Hriselna hi a hlu a, mitinin dam leh hrisel kan duh vek. Chutih rualin engemaw damloh nikhua nei thei vek kan ni a, kan damloh huna kan pan theih tur damdawi in lian zawk kan neih zel pawh a pawimawh hle. Tuna private damdawi in ten MUHCS an zawm lohna chhan ber nia lang hi rate chungchangah a ni a, phai lam aia rate tlawm zawka sawrkar hian nawr a tum nia hria in hei hi an pawm thei lo niin a lang a. Chuvangin dawhkan khat kil a, inpawh taka sawiho a pawimawh ta ber niin a lang. 

Mizoram Universal Health Care Scheme chungchangah hian a tuartu ber chu mipui rethei zawkte an ni a, loh theih loha cheng tam tak chawia private damdawi in an pan thin te hi an khawngaih thlak hle. Chuvangin sawrkar hian pa chan changin hma han la leh thei hram se. Chutih rualin private damdawi in te pawhin mipui leh damlo harsa zawk te dinhmun ngaihtuah chungin inhnuk hniam thei se a duhawm hle.