Tun hnai maiah Khasi zirlai pawl Khasi Students' Union (KSU) huaihawtin Shillong khawpuiah black-flag bike rally neih a ni a, he rally ah hian buaina chhuakin state dang lirthei engemaw zat tih chhiat anih bakah kut tuar pawh an awm hial a ni. Khasi zirlai pawlte hian hna hauhsak, leilung hausakna humhalh, inrelbawlna felfai zawk neih te chu an thilphut langsar a ni a. Hemi phenah hian an state-a hnamdang tam ta lutuk an ngaimawh vanga he thil hi thleng a ni bawk.

Kan hriat angin Shillong hi khawpui hlun, sap ho awm lai pawha an khawpui a ni a. Khasi khawpui tia sawi thin anih laiin a ram neitu Khasi te hi sumdawnna mai bakah thil dang dangah chimral an ni ta niin a ngaih theih a. Shillong khawpuia sumdawnna hmun lian leh dawr lian zawng zawng deuh thaw hi hnamdang ta a ni a, hnamdang sakhaw hun pawimawh lai puja nikhua te hian an sumdawnna hmun lian ber Police Bazaar an tihah dawr lian zawng zawng deuh thawh chu a inkhar thin a ni. Tun dinhmunah chuan hnamdang mi hausa hnuaiah a ram leilung fate an inhlawh thin a, hemi awmzia chu sumdawnna kawngah chuan an chimral tawh tihna a ni a. Hei hi zirlai pawlte hian an ngaimawh em em a, tharum leh thildang hmangin hma han la thin mah se awmzia a nei tlem hle.

Kan chhehvel hnam hrang hrang han en ila hnam chak leh thiltithei zawk ten an chimral deuh vek tawh a, hetih lai hian Mizote erawh vawiin ni thlengin chimralna laka kan la him hram hram hi a lawmawm tak zet a ni. Mithiam ten an sawi thin a, Mizoram buai hma deuh khan kan nula te khan hnamdang (vai) an ngaisangin an kawm nasa hman hle a. Incheina kawngah pawh hnamdang incheina kha nalh an tiin 'Sari kaih' pawl te pawh an awm hman hial a ni awm e. Mahse Mizoram a buai tak hnu khan hnamdang an awm tlem a, incheina chungchangah pawh MNF lam khan an duh loh thu an sawi avangin hnamdang incheina leh tihdan kha an chhunzawm ta lo niin an sawi a.

Mizoram buai te kha awm ta lo se kan sumdawnna hi min chimral tawh mai bakah kan incheina leh sakhua thlengin thuk takin hnamdang tihdan hian min hruai hial awm e. Chutiang zelin Mizoramin remna leh muanna a neih hnuah pawh hnamdang an pun tam leh hnawk kan tih hun hi chuan engemaw buaina leh harsatna hi a thleng deuh zel emaw tih hial mai tur a ni a, Mizoram chhunga hnamdang awmte hi kan hnawhchhuah leh vau pawh ni lemlo hian an haw thin a. 

Pathian hnathawh Mizoten kan la hmu zel pawh a tih theih awm e. Hetih lai hian Mizo zingah sum tlemte hlawha hnamdang thurualpui kan awm thin erawh a pawi tak zet a. Hnamdang sumdawngte hi an fing a, kan thurualpui chuan zawi zawiin kan sum leh pa eiin nakin lawkah chuan kan ram economy hi an la thunun thuai dawn a ni. Shillong thilthleng hi inzir nan i hmang ang u.